स्वला लिपा येँय् फोहोरया संकट

येँ – स्वला लिपा स्वनिगलय् फोहोर द्वँ तच्वः जुइक हे मुनीगु अवस्था वये फइगु खँ धाःगु दु । आः फोहोर वायेगु यानाच्वंगु सिसडोलय् फोहोर वाये फइगु अवस्था मदुगुलिं वयां लिपा फोहोर मुनेत समस्या जुइगु खँ विज्ञतय्सं धाःगु दु । २०६३ सालय् स्वदँया निंतिं फोहोर वायेगु धकाः सिसडोलय् फोहोर वायेगु शुरु याःगु खःसां नं झिनिदँ तक नं निरन्तर रुपं अन हे फोहोर वायेगु यानाच्वंगुलिं फोहोर वायेगु थाय् जायाः आः थप फोहोर वाये फइगु अवस्था हे मदुगु खँ येँ मनपाया कर्मचारीतय्सं धाःगु दु ।

मनपा सूत्रया कथं आः हे नं सिसडोलय् फोहोर वायेगु ज्याय् समस्या जुयाच्वंगु दुसा अन जबर्जस्ती जक फोहोर वायेगु ज्या जुयाच्वंगु दु । अन वा वयाः चल वन धाःसा अझ लँय् वनेत हे समस्या जुइफुगु खँ कँसें सूत्रं याकनं समस्या समाधान यायेगुपाखे मनपां खास ध्यान बिया मच्वंगु खँ नं धाःगु दु ।