प्रदेश नम्बर ३ । अर्थात नेवाःतय्गु दकलय् अप्वः आवादी दुगु प्रदेश । उकिं थ्व प्रदेशया नां ‘नेवाः प्रदेश’ जुइमाः धइगु नेवाःतय्गु माग । थ्व प्रदेशय् नेवाः जक मखु तामाङतय्गु नं यक्व संख्या दु । उकिं नेवाः व तामाङया मंकाः थाय् जूगु कारणं थ्व प्रदेशया नां ‘नेवाः ताम्सालिङ’ जुइमाः धइगु नं मेगु छथ्वःसिया माग ।
तर थौंया इलय् ‘नेवाः प्रदेश’ अथवा ‘नेवाः ताम्सालिङ’ प्रदेश नां जुइगु सम्भावना कम जक दु । उकिं दथुया मिलनविन्दू कथं ‘नेपालमण्डल’ प्रदेश नां तये माली धइगु मध्यपन्थीतय्गु माग ।छुं ई न्ह्यः तक नं थ्व स्वंगू मध्ये गुगु नां तये माली धइगु खँय् नेवाःतय् दथुइ हे तानातान । नेवाः प्रदेश धाइपिंसं नेवाः–ताम्सालिङ पक्षधरया आलोचना यानाच्वंगु दु ।
नेवाः–ताम्सालिङवालातय्सं नेपालमण्डलवालातय्त ब्वः बियाच्वंगु दु । वं वइत नेवाः विरोधी धाइगु, वं वइत नेवाः विरोधी धाइगु । खुब वहस न्यात । आः वयाः खँ वल, प्रदेशया नां ला नेपालमण्डल तक नं जुइगु सम्भावना मदुनि ।छगू इलय् नेवाः पसः पुनाः नेवाः प्रदेश माल धकाः पिहां झाःम्ह नेता भाजु पुष्पकमल दाहाल प्रचण्डं उकुन्हु तिनि नेवाः न्ह्यलुवातय् छगू पुचःलिसे खँ ल्हासें धयादिल, ‘जितः यःगु ला नेवाः प्रदेश हे खः ।
तर व आः सम्भव मदु । व धुंकाः यःगु नेपालमण्डल खः । व नं ढुक्क जुइगु थाय् मदु ।’ सम्भव दुगु छु खः व ढुक्क जुइ फइगु छु खः व आः तक सी मदुनि । सीदुगु थुलि हे जक खः कि नेपालमण्डलय् ढुक्क जुइ फइगु स्थिति मदुनि ।
छखें ला थ्व स्वंगू बाहेक मेगु प्यंगूगु नां वल धाःसा झीत आनन्द नं जुइगु खइ । छाय्धाःसां नेवाः–ताम्सालिङ तल धाःसा नेपालमण्डल गुटं थः पराजित जूगु तायेकी । नेपालमण्डल तल धाःसा नेवाः–ताम्सालिङ गुटं थः बूगु महसुस याये माली । उकिं निगुलिं गुटयात त्याकेगु खःसा प्यंगूगु नां हे वये माःगु आवश्यक जुल । झी नेवाःत प्यंगूगु नांया लागिं तयार खः ला ?
LEAVE YOUR COMMENTS