शिक्षाय् अभिभावकया भूमिका

हसना महर्जन

Practical way is the best way of learning. धाथें थ्व धापू ब्वनेकुथिइ जक मखु झी दक्व अभिभावकपिंसं थःथःगु छेँय् नं छ्यला यंकेमाःगु खनेदु । छम्ह मचा बुसांनिसें ब्वनेकुथिइ पलाः तये न्ह्यः तक छेँय् च्वनाः थः मांअबु, बाज्या, अजि नाप च्वनाः थःत माःगु कथं सामाजिक, नैतिक शिक्षा हासिल यानाच्वंगु दइ ।

थुकियात नं छगू सामाजिक, मानसिक शिक्षा कथं झीसं कायेमाः । छम्ह अभिभावकया छु चाहना दइ धायेबलय्् थः मचा तःधिक जुइकाः छम्ह जिम्मेवार नागरिक जुयाः लिपा जीवनय् सफलताया च्वकाय् थ्यनेमाः । थ्व इच्छा पूवंकेगु निंतिं ब्वनेकुथिया गुलि तःधंगु भूमिका दइ, उलि हे भूमिका अभिभावकया नं दइ ।

अले थुकी अभिभावक थः मचाया शिक्षा व मचायात गुलि बुझे जुयाः थःम्हं मचाप्रति याइगु व्यवहार व बिइगु शिक्षाय् नं निर्भर जुइ । दकलय् न्हापां अभिभावकं थौंकन्हय् वयाच्वंगु शिक्षण प्रणाली बांलाक थुइके माःगु खनेदु । न्हापा स्वयां थौंकन्हय्या शिक्षा प्रणाली यक्व हे पायेधुंकल ।

न्हापायागु शिक्षा प्रणाली कथं स्वयेगु खःसा मचां किताबी ज्ञान बाहेक मेगु छुं नं खँ बांलाक सयेकाकाःगु दइमखु । तर आः वयाच्वंगु शिक्षा प्रणाली स्वयेगु खःसा Early childhood education यक्व बांलाःगु खनेदु । थ्व प्रणाली कथं ब्वनेकुथिइ मस्तय् इच्छा, व्यवहार थुइकाः व हे कथं शिक्षा बियाच्वंगु दु ।

बांलाःगु लकस बियाः उमिगु बिचाः थुइकाः मस्तय्त ब्वंका च्वंगु जूसां नं गबलें गबलें अभिभावकपाखें हे बांलाक खँ थुइके मफया ब्वनेकुथिं थीथी कथंया समस्याया सामना यायेमाला च्वनी । अथेहे मचा गुलि एक्टिभ जुइमाःगु खः, उलि जुयाच्वनी मखु । छम्ह अभिभावक जुयाः दकलय् न्हापां छगू खँ छु थुइके माःधाःसां मचाया शिक्षा धयागु छेँय् नं निसें हे सुरु जुइ ।

धयातःगु नं दु की Parents are a kid’s first teachers . उकिं मस्तय्सं अभिभावक नापं च्वनाः यक्व खँ सयेकी । तर अप्वः धयाथें मांअबुया छु सोच दइ धाःसां ब्वनेकुथि वनाः हे जक दक्व खँ सयेकी । तर स्वयेगु खःसा मचां ५० प्रतिशत थः मांअबुपाखें व मेगु ५० प्रतिशत ब्वनेकुथिइ वनाः थः स्यनामिपाखें सयेकी ।

ब्वनेकुथिइ वनाः मचां थौंकन्हय् छु सयेकी ले धयागु न्ह्यसः नं अभिभावकपिंके दयाच्वनी । मचा ब्वनेकुथिइ दुहां वनेधुनेवं अनया Currirulum कथं मेपिं नाप मग्यासे गय् यानाः न्ववायेगु (Safe communication skills), शब्द गन गथे यानाः छ्यलेग (Language skills), न्हूगु थासय् न्हूपिं मनूत नाप गुगु कथं व्यवहार यायेगु (Social development) अले थःगु मनया खँ मग्यासे दक्वसिगु न्ह्यःने गय् यानाः तयेगु (self expression in confident way) थेंज्याःगु थीथी खँ सयेकाच्वनी ।

मचां ब्वनेकुथिइ वनाः थ्व खँत मचायेक हे अनया लकसपाखें थुइकाः कयाच्वंगु दइ । तर थ्व हे खँयात छेँय् अभिभावकपिंंसं बुझे मजुसे मस्त नाप मेगु कथंया व्यवहार यानाबिल धाःसा अज्याःम्ह मचाया विकास बांलाक जुइमखु । अले ब्वनेकुथिइ ब्वनातःगु ५० प्रतिशत बांलाःगु शिक्षा नं तनावनी ।

अप्वः अभिभावकपिनि छु धापु दु धाःसा थः मस्त ब्वनेकुथिइ जक ज्ञानी, छेँय् तसकं हारां, धाःगु छुं माने जुइमखु, एकदम जिद्दी । मां अबुया respect याइमखु, अले अप्वःसिनं ब्वनेकुथियात हे दोष बियाच्वंगु दइ । तर छम्ह बांलाःम्ह अभिभावकं छु थुइके माः धाःसां मचां न्ह्याबलें छु खन वं व हे याइ । Childern imitate others छु खन व हे सयेकी ।

उकिं छम्ह अभिभावक थः मचाया न्ह्यःने छम्ह role model जुयाः दने फयेकेमाः । थुकिया निंतिं थः मचां गज्याःगु शिक्षा कयाच्वन धयागु बांलाक थुइकेमाः । होमवर्क यायेगु व किताब ब्वनेगु जक शिक्षा मखु । मस्तय्त झीसं व्यावहारिक शिक्षा नं बीमाः । मस्तय्सं म्हिताः म्हिताः नं गुलि खँ सयेकाच्वंगु दइ । गबलें थः मांअबुयात स्वयाः नं सयेकाच्वंगु दइ ।

उकिं अभिभावकं थौंकन्हय्या शिक्षा प्रणाली थुइकाः उकीयात व्यवहार कथं छ्यलेगु याःसा जक थः मचायात बांलाक थुइकेफइ । थःगु इच्छा मस्तय्त लाडे यायेगु स्वयां नं मचा छुकि बांलाः, वया इच्छा छुकि दु उकी हे प्रोत्साहन बियाः यंकल धाःसा छम्ह मचां यक्व प्रगति यानाः थःगु जीवन सुथां लाक्क न्ह्याकेफइ ।

थौंकन्हय् दक्व खँय् प्रतिस्पर्धा जुयाच्वंगु इलय् थः मस्तय्त नं मेपिं मस्त नाप प्रतिस्पर्धी यायेगु झ्वलय् अभिभावकं छु खँ ल्वःमंकी धाःसा उकिया लिच्वः थः मचायात गुलि तक लायेफु । उकिया लागि अभिभावकं थुइकेमाःगु धयागु हे व्यावहारिक शिक्षा व न्हूगु शिक्षा प्रणाली खः ।