जोशीया शैक्षिक प्रमाणपत्रय् विवाद

येँ – न्हूम्ह प्रधानन्याया– धीशया निंतिं प्रस्तावित दीपकराज जोशीया शैक्षिक प्रमाणपत्र नक्कली जूगु खँ पिहां वःगु दु । प्रधानन्यायाधीश नियुक्तिया निंतिं संसदीय सुनुवाई सुरु जुइत्यंगु इलय् हे वय्कःया शैक्षिक प्रमाणपत्रयात कयाः विवाद पिहां वःगु खः । वय्कःया नियुक्ति बारे थौं बिहिवाः संसदीय सुनुवाई जुइत्यंगु दु ।

वय्कःया शैक्षिक प्रमाणपत्रयात कयाः सुनवाई समितिइ उजुरी लानाच्वंगु दु ।सत्तारुढ नेकपाया सांसदतय्सं संसदीय सुनुवाईया इलय् शैक्षिक प्रमाणपत्रया मुद्दाय् खँ ल्हायेत विज्ञतय्त तयेगु खँ धाःगु खःसां प्रमुख प्रतिपक्षीया सांसदत माने मजुइवं थौं विज्ञ मतसे हे सुनुवाई जुइत्यंगु खः । प्रस्तावित प्रधानन्यायाधीश विरुद्ध मेगु नं निगू उजुरी संसदीय सुनुवाई समितिइ दर्ता जुयाच्वंगु दु ।

वय्कः सरकारी नामय् लानाच्वंगु नरःया ३६ रोपनी जग्गायात व्यक्तिया नामय् पास याना बीगु फैसला याःपिं न्यायाधीशत मध्ये छम्ह खः । निदँ न्ह्यः न्यायाधीश जोशी सहितया इजलासं नरलय् गबलें हे मच्वंपिं, गबलें हे मखंपिं ओखलढुंगाया भट्टराई थरया छम्हेसिया नामय् निगू अर्ब तका स्वयां अप्वः तूगु ३६ रोपनी चाःचू जग्गा पास याना बीगु फैसला याःगु खः ।