स्वयेबहपिं कासामि

पाउलो पोग्बा, मिडफिल्डर, फ्रान्स

फ्रान्सया निंतिं यु १७ निसें यु २० या उमेर समूहलय् कप्तान जुयाः म्हितावयेधुंकूम्ह पोग्बा छम्ह बांलाःम्ह मिडफिल्डर खः । पोग्बा सन् २०१३ य् जूगु यु २० फिफा विश्वकपया उपाधी नं त्याकूगु खः । पोग्बा सिनियर टिमय् डेब्युलय् जर्जिया विरुद्ध न्हापांखुसी म्हितूगु खः । ब्राजिलय् जूगु विश्वकपय् पोग्बा उत्कृष्ट युवा कासामिया उपाधी त्याकूगु खः ।

अथे हे पोग्बा फ्रान्सया निंतिं युरो २०१६ नं म्हितूगु खःसा उबलय् फ्रान्सयात फाइनल तक थ्यंकेत छगू गोल नं याःगु खः । फ्रान्सया निंतिं ५८ गू कासा म्हिताः पोग्बां ९ गोल यायेधुंकूगु दु । पोग्बा थौंकन्हय् म्यानचेस्टर युनाइटेडया कासामि खः । मोरुने फेलानी, मिडफिल्डर, बेल्जियम
मोरक्कन मांअबुपाखें बूम्ह मोरुने फेलानी थीथी बेल्जियम क्लबपाखें म्हितेधुंकूगु दु ।

फेलानी लिपा वनाः प्रिमियर लिग क्लब इभर्टनं म्हितल । इभर्टनय् न्यादँ तक म्हितेधुंकाः थौंकन्हय् व मेगु प्रिमियर क्लब म्यानचेस्टर युनाइटेडपाखें म्हिताच्वंगु दु । फेलानीं मोरक्को व बेल्जियम मध्ये छगू देशं फुटबल म्हितेगु ल्ययेमाःबलय् बेल्जियमं म्हितेगु निर्णय याःगु खः ।

सन् २००८ य् जूगु ओलम्पिकय् यु २३ टिम पाखें म्हिताः फेलानी बेल्जियमयात सेमिफाइनल तक थ्यंकूगु खः । फेलानी सन् २००७ य् बेल्जियमया निंतिं डेब्यु याःगु खः । फेलानी सन् २०१४ विश्वकप व सन् २०१६ युरोकप म्हितूगु खः । रसियाय् जुयाच्वंगु विश्वकपय् वं छगू गोल यायेधुंकूगु दु । जापान विरुद्ध जूगु प्रिक्वार्टरफाइनल कासाय् निगू गोलं लिउने लाःगु बेल्जियमया निंतिं फेलानीं बराबरीया गोल याःगु खः ।