स्पेन नं छेँय् लिहां वन, टाइब्रेकरय् रसिया त्यात

एजेन्सी- रसियाया गोलपिकर इेगार आकिनफिभ नायक जुइवं विश्वकपया दावेदार स्पेन छेँय् लिहां वनीगु जूगु दु । नकतिनि जूगु कासाय् ग्वसाः देय् रसियां स्पेनयात टाइब्रेकरय् ४–३ गोलं बुकूगु खः । नियमित ९० मिनेटया कासाय् १–१ गोलया बराबरी जुइवं कासा अतिरिक्त इलय् वंगु खः । अतिरिक्त इलय् निगुलिं टिमं गोल यायेमफयेवं कासा टाइब्रेकरय् वंगु खः ।

टाइब्रेकरय् रसियाया गोलकिपर इगोर आकिनफिभं निगू गोल पनाबिउगु खः । पेनाल्टिइ निगू निगू गोल जुइधुंकाः स्पेनया काकें थ्वाःगु बलयात व लागो आसपासं थ्वाःगु बल आकिनफिभं पनाबिउगु खः । स्पेनया निंतिं भेट्रान कासामित इनिस्टा, सर्जियो रामोस व जेरार्ड पिकं जक गोल याःगु खः ।

रसियाया निंतिं फेडर स्मोलोभ, सेर्गेइ इन्गासेभिच, अलेक्जेन्डर गोलोभिन व डेनिस चेरिसेभं गोल याःगु खः । कासाया १२ औं मिनेटय् फ्रिकिक क्लियर यायेगु झ्वलय् रसियाया सेर्गेइ इन्गासेभिचपाखें आत्मघाती गोल जुइवं स्पेनं अग्रता काःगु खः । तर न्हापांगु हाफ क्वचाये न्ह्यः जेरार्ड पिक पाखें डिबक्सय् ह्याण्ड जुइवं रसियायात पेनाल्टि वःगु खः । पेनाल्टिइ आर्टेम डिज्युबां गोल यासें कासा बराबरीइ हःगु खः । थ्व लिपा निगुलिं टिमं छगू नं गोल यायेमफुगु खः ।