प्राइम व कैलासया बिहिवाः निसें एकीकृत कारोवार

येँ – प्राइम कमिर्सयल बैंकं वइगु बिहिवाः (फागुन २९ गते) निसें कैलास विकास बैंकयात मर्ज यानाः एकीकृकत कारोवार न्ह्याकीगु जूगु दु। थुकिया निंतिं सिस्टमय् मिले यायेत थ्वयां छन्हु न्ह्यव बुधवाः निगुलिं बैंकं कारोबार बन्द याइगु जूगु दु। प्राइमं कैलास विकास बैंकयात १ बराबर ०.९४ प्रतिशत शेयर अनुपातय् प्राप्ति याःगु खः ।

स्वाप रेसियोया आधारय् बोनस शेयर लिपा कैलास विकास बैंकया पुँजी २ अर्ब ७४ करोड थ्यंगु दु। आः थ्व पुँजी रकम प्राइम बैंकय् स्वाः वइगु जूगु दु। थ्व पुँजी स्वाः वयेधुंकाः प्राइमया चुक्ता पुँजी १३ अर्ब ५५ करोड थ्यनीगु जूगु दुसा जगेडा कोष नं ११ अर्ब २५ करोड थ्यनीगु जूगु दु ।

प्राइमया जगेडा कोष थौंकन्हय् ८ अर्ब ५ करोड दसा कैलाशया ३ अर्ब २० करोड दु। कैलाश विकास बैंकया थौंकन्हय् स्वनिगलय् २५ गू व स्वनिगः पिने ७६ गू शाखा ज्याकू दुसा प्राइमया स्वनिगलय् २४ गू व स्वनिगलं पिने ७५ गू शाखा ज्याकू दु ।