मानन्धर संघया २८ क्वःगु तःमुँज्या

येँ – केन्द्रीय मानन्धर संघया २८ क्वःगु तःमुँज्या वंगु शनिवाः जुल । संघया सभापति गोपालकृष्ण मानन्धरया सभापतित्वय् जूगु तःमुँज्याया उलेज्या १०२ दँ दुम्ह देय् थकालि ललितमान मानन्धरं त्वाःदेवाय् मत च्याकाः यानादीगु खः । संघया संस्थापक सभापति देवीदास मानन्धरया किपाय् स्वां देछासें न्ह्याःगु ज्याझ्वलय् संघया उपसभापति बद्रीनारायण मानन्धरं लसकुस यानादीगु खः ।

तःमुँज्याय् संघया सचिव गजेन्द्रमान मानन्धरं वार्षिक प्रगति प्रतिवेदन व कोषाध्यक्ष सन्देश मानन्धरं आर्थिक प्रतिवेदन न्ह्यब्वयादीगु खः । निगुलिं प्रतिवेदनयात कयाः तःमुँज्याय् उपस्थिति त्वाः, गुथि, खलःया प्रतिनिधिपिंपाखें व्यापक सहलह लिपा उकियात पारित याःगु खः ।

ज्याझ्वलय् हरिओम मानन्धर (लाय्कूसाः), किरण मानन्धर (लाय्कूसाः), श्यामकृष्ण मानन्धर (न्यागःमणि फेदी), केदारनारायण मानन्धर (तःखाछेँ खलः), ज्ञानकाजी मानन्धर (भ्वँत), प्रकाशबहादुर मानन्धर (भिंद्यः गुथि), गौतम मानन्धर (पुखुद्यां), त्रिरत्न मानन्धर (चस्वांद्वँ), सुवर्ण साय्मि (पुखुद्यां), विक्रमदास मानन्धर (तःखाछेँ खलः) लगायतया प्रतिनिधिपिंसं संघं भविष्यय् न्ह्याकेमाःगु थीथी पलाःया बारे सुझाव बियादीगु खः । उगु तःमुँज्यां वइगु आर्थिक दँया निंतिं लेखापरीक्षकया नं नियुक्ति याःगु खः ।