तोखायात पर्यटकीयस्थलया रुपय् विकास यायेत गुरुयोजना

येँ- येँय् नं उत्तरय् लाःगु ऐतिहासिक नेवाः बस्ती तोखायात धार्मिक पर्यटकीय नगरीया रुपय् विकास याइगु जूगु दु । उकिया निंतिं तोखा नगरपालिकां छगू गुरुयोजना नं तयार यायेधुंकूगु दु । तोखा देय्यात धार्मिक पर्यटकीयस्थलया रुपय् विकास यायेगु ल्याखं गुरुयोजनातकं तयार जुइधुंकूगु तोखा नगरपालिकाया उपप्रमुख ज्ञानमाया डंगोलं जानकारी बियादीगु दु ।

तोखा दुने लाःगु ऐतिहासिक व धार्मिक महत्वया थाय्बाय् सपनतीर्थ, तलेजु, तोखा चण्डेश्वरी, इन्द्रायणी, सरस्वति, थःनेलाछि, क्वःनेलाछिलिसें बौडेश्वर, धापासी, बसुन्धर, झोर महांकाल, ग्वंगःबुँ तकया लागायात गुरुयोजनाय् दुथ्याकागु उपप्रमुख डंगोलं धयादीगु दु । अथे हे तोखा नगरपालिकां थःगु क्षेत्र दुने लाःगु सपनतीर्थ व पुखूया संरक्षण यानाः पर्यटक दुकायेगु कार्ययोजना नं नगरपालिकां दयेकूगु दु ।

वइगु आर्थिक दँय् धार्मिक स्थलयात पर्यटकीयस्थल दयेकेगु गुरुयोजना तयार याःगु नगरपालिकां तोखायात नमूना नगरपालिकाय दयेकेगु ल्याखं प्रत्येक वडाय् छगू करोड पीगू लाख तका बजेट विनियोजन यायेगु कार्ययोजना नं दयेकूगु दु ।

थ्व हे झ्वलय् तोखायात पर्यटकीस्थलया रुपय् विकास यायेत नगरपालिकां सरकारयाके २५ गू करोड तका माग याइगु जूगु दु । झण्डै छगू लाख स्वयां अप्वः जनसंख्या दुगु तोखा नगरपालिका दुनेया ११ गू वडाया निंतिं वंगु आर्थिक २९ करोड ५१ लाख बजेट विनियोजन याःगु खःसा १२ करोड राजस्व संकलन जूगु जानकारी नं वय्कलं बियादीगु दु ।