लुँया भावय् न्हूगु रेकर्ड, बजाः सुनसान
येँ (नेपालभाषा टाइम्स)/ अन्तर्राष्ट्रिय बजारय् लुँया भावय् न्हूगु रेकर्ड कायम जूसां नं नेपालय् लुँया बजाः धाःसा सुनसान जुयाच्वंगु दु । म्हिगः नेपाःया बजारय् लुँया भाः तोलां २ लाख १२ हजार तका कायम जूगु खः ।
नेपालय् लुँया भाः थिके जुयाः नखःया इलय् तकं व्यापार मजुयाच्वंगु खँ नेपाल सुनचाँदी व्यवसायी संघया पुलांम्ह अध्यक्ष लिसे बजाः विश्लेषक तेजरत्न शाक्यं कनादीगु दु ।
वय्कःया कथं सरकारं लुँइ २ प्रतिशत विलाशीता कर कायेवं ग्राहकत लुँ न्यायेगु स्वयां नं पुलांगु हे तिसा न्हूगु दयेकेगु वा बजारय् दुगु नक्कली तिसा तीगु पाखे आकर्षित जूगु दु ।
छखे नेपाःया बजारय् लुँया भाः थिके जुयाच्वंगु दुसा मेखे नेपाःमिया क्रयशक्ति नं म्हो जूगुलिं नं लुँ न्यायेत ग्राहकत आकर्षित मजूगु खँ नं वय्कलं धयादिल ।
वय्कःया कथं वंगु तीजया इलय् नं लुँ बजारय् खास हे व्यापार मजूसा मोहनि नखः न्ह्यःने थ्यंकः वःसां नं लुँ न्याइपिं धाःसा मनूत हे मदुगु खँ कनादिल ।
नेपालभाषा टाइम्स लिसे खँ ल्हायेगु झ्वलय् वय्कलं धयादिल, ‘छखे लुँया भाः थिके जुयाच्वंगु दुसा मेखे नेपाःमिया क्रयशक्ति म्हो जुयाच्वंगु दु । थज्याःगु इलय् लुँ न्यायेगु सिवें नक्कली तिसा न्यायेगु प्रचलन अप्वया वनाच्वंगु दु ।’
थौं कन्हय् लुँया बजारय् खास हे मनूतय्सं ध्यान बियामच्वंगु खँ कनादिसें वय्कलं धयादिल, ‘थिकेगु लँुया तिसा स्वयां नं नक्कली तिसा हे लुँ थें बांलाःगुलिं यानाः आपालं मनूत नक्कली लुँइ आकर्षित जुयाच्वंगु खनेदु ।
मेखे नेपालय् लुँया भाः थिके जूगु कारणं यानाः नेपाःया ग्राहकत भारतीय बजारय् आकर्षित जुइ फइगु सम्भावना दुगु खँ नं वय्कलं धयादीगु दु ।
वय्कःया कथं भारतय् नेपालय् स्वयां लुँया तिसा ९ हजार तका पाः अथेजुयाः गुलिखे लुँ न्यायेमाःपिं नेपाःमि भारतय् वनाः नं लुँ न्याइगु सम्भावना दु ।
वय्कलं बियादीगु जानकारी कथं नेपाल सरकारं लुँइ १० प्रतिशत कर व २ प्रतिशत विलासी कर कायेगु यानाच्वंगु दु । तर भारतय् ६ प्रतिशत जक कर कायेगु यानाच्वंगुलिं यानाः नेपालय् स्वयां भारतय् लुँ दंगु खः ।
अन्तर्राष्ट्रिय बजारय् लुँया भाः थहां वंगु कारण धाःसा अमेरिकी डलर स्वयां भारतीय करेन्सी व नेपाःया करेन्सी अवमूल्यनया कारण जूगु खँ नं वय्कलं धयादिल । म्हिगः नेपालय् प्रति अमेरिकी डलर १४१.५३ तका कायम जूगु खः ।
LEAVE YOUR COMMENTS