यलया न्हू पुखूयाः अवैध संरचना थुनाबिल

यल (नेपालभाषा टाइम्स)/ यल महानगरपालिकां जावलाखेलस्थित न्हू पुखूलिइ दयेकातःगु अवैध संरचना थुनाबिउगु दु । यल मनपां म्हिगः पुखूया उत्तरपाखे च्वंगु छेँय् डोजर छ्यलाः थुनाबिउगु खः । न्हू पुखूया उत्तरी ब्व मिचे यानाः दयेकातःगु बुद्धि विकास मण्डल व नेपाल क्षयरोग निवारण संघ छ्यला वयाच्वंगु भवन थुनाबिउगु खः ।
यल मनपां वंगु साउन १७ गते ३५ न्हूया सुचं बियाः उगु क्षेत्रय् दुगु अनाधिकृत संरचना चीकेत इनाप याःगु खः । यल मनपां बिउगु ईया दुने चीकेत अटेर यायेवं यल मनपां थम्हं संरचना थुनाबिउगु खः । यल मनपाया वडा नम्बर ५य् दुगु ऐतिहासिक न्हू पुखूयात यल मनपां पुनर्निर्माण यायेत्यंगु खः । उगु ज्याया निंतिं तयार याःगु विस्तृत परियोजना प्रतिवेदन (डीपीआर) नगर कार्यपालिकां स्वीकृत जुयाः बजेट तकं विनियोजन जुइधुंकूगु दु ।
वुद्धि विकास मण्डलया अध्यक्ष पवन रानामगरं यल मनपा लिसे पटक–पटक सहलह यानाः नं निकास पिहां मवःगु खँ धयादीगु दु । भवन थुनेगु सम्बन्धय् यल उच्च अदालतं अन्तरिम कारण देखाउ आदेश जारी याःसां नं यल मनपां उकियात पालनाः मयासें संरचना थुंगु द्वपं नं रानामगरं बिउगु दु । यल मनपां स्थानीय सरकार सञ्चालन ऐन, २०७४ या दफा ९७, व मुलुकी देवानी संहिता २०७४ या दफा ३०४ कथं सार्वजनिक सम्पत्ति संरक्षण यायेगु दायित्व सम्बन्धित स्थानीय तहया जूगु खँ न्ह्यथँसें वंगु साउन १६ गतेया निर्णय कथं न्हू पोखरीया उत्तर पूर्व पुखूलिं दयेकातःगु अनाधिकृत संरचना चीकेत ३५ न्हूया म्याद बिउगु खः ।