सामाजिक सञ्जाल बन्द व भ्रष्टाचारविरुद्ध थौं जेनजी पुस्ताया प्रदर्शन
येँ (नेपालभाषा टाइम्स)/ सामाजिक सञ्जालत बन्द जुइवं जेनजी पुस्ता थौं सतकय् कुहां वयाः आन्दोलन न्ह्याकीगु जूगु दु । जेनजी पुस्ता धयापिं सन् १९९७ निसें २०१२ तकया दुने बूपिं पुस्ता खः ।
आन्दोलनया निंतिं जेनजी पुस्तायापिंत थौं माइतीघरय् मुनेत टिकटकमार्फत आह्वान यानातःगु दु । आन्दोलनय् वइपिंत स्कुलय् ड्रेसय् सफू व छपाः एफोर पेपर ज्वनावयेत धयातःगु दु । थ्व प्रदर्शन राजधानी येँय् जक मखु, पोखरा, इनरुवा, धरान थेंज्याःगु सहरय् नं यायेगु घोषणा जुइधुंकूगु दु । सामाजिक सञ्जाल फेसबुकय् सक्रिय थीथी पुचःयापिंसं ‘वेक अप युथ, वेक अप जेनजीज्’ नाराया बियाः प्रचार यानाच्वंगु दु ।
थ्व आन्दोलन सामाजिक सञ्जाल बन्दविरुद्ध जक मखु, देशय् जुयाच्वंगु भष्टाचार, वंशवाद, असमान सम्झौता, नागरिक अधिकार हनन, बेरोजगारी विरुद्ध आन्दोलन जुइगु खँ धयातःगु दु । जेनजी पुस्ताया थ्व प्रदर्शनया आह्वान टिकटकय् ट्रेण्डिङ जुयाच्वंगु दु । तर थ्व आन्दोलनया नेतृत्व सुनां यायेत्यंगु धयागु धाःसा सीमदुनि । आन्दोलनया नेतृत्वकर्तात सीमदुगुलिं आन्दोलनया प्रभावयात कयाः थीथी टिप्पणी जुयाच्वंगु दु ।
जेनजी पुस्ताया थ्व आन्दोलनयात थ्वयां च्वय्या पुस्तायापिं यक्वस्यां समर्थन यानाच्वंगु दुसां नेतृत्वविहीन आन्दोलन निष्कर्षय् मथ्यनीगु खँय् नं चिन्ता प्वंका वयाच्वंगु दु । नेपाःया छुं नं आन्दोलनय् नेतृत्व मदयेकं पूमवंगु धासें जेनजी पुस्ताया आन्दोलनया नेतृत्व सुनां यानाच्वंगु धयागु न्ह्यसःत नं सामाजिक सञ्जालय् वयाच्वंगु दु । थ्व आन्दोलन च्वन्ह्यायेधुंकाः गुगु दलतविरुद्ध आन्दोलित जुयाच्वंगु खः, उगु हे दलतय्सं आन्दोलनया नेतृत्व याः वइ धयागु चिन्ता नं प्वंका हयाच्वंगु दु ।
थ्व अभियानया झ्वलय् सामाजिक सञ्जालय् नेतातय् सन्तानया जीवनशैलीयात कयाः नं आलोचना जुयाच्वंगु दु । विशेषतः शेरबहादुर देउवा, पुष्पकमल दाहाल, बाबुराम भट्टराईया सन्तानय् जीवनशैलीयात कयाः टिप्पणीत जुयाच्वंगु दु।
नेपाली कांग्रेसं सहलह याइगु
सामाजिक सञ्जाल बन्द बारे नेपाली कांग्रेस दुने नं सः तच्वयावःगु दु । थ्व हे सःयात सम्बोधन यायेगु निंतिं कांग्रेसं सामाजिक सञ्जाल बन्दया बारे छन्हु निन्हुं हे बैठक च्वनाः सहलह याइगु जूगु दु ।
मनाङ प्रदेशसभा क्षेत्रय् जुइगु उपनिर्वाचनया निंतिं निर्वाचन आयोगय् दल दर्ता यायेगु बारे सहलह यायेत म्हिगः च्वंगु केन्द्रीय कार्यसम्पादन समितिया बैठकय् ब्वति काःपिं नेतातय्सं सामाजिक सञ्जाल बन्दया बारे सः तयेवं सभापति शेरबहादुर देउवाः छन्हु निन्हुं हे थुकिया बारे सहलह यायेगु खँ धाःगु खः । वैठकय् विशेषत महामन्त्री गगन थापां सामाजिक सञ्जाल बन्दयात कयाः सः तःगु खः । महामन्त्री थापां सरकारं सत्ता साझेदारत लिसे सहलह हे मयासे धराधर म्वाःमदुगु निर्णय याइगु, अले सरकार दुथ्याःगु नामय् कांग्रेसं नं उकिया अपजस फयाच्वनेगु खः ला धकाः न्ह्यसः तयादीगु खः ।
LEAVE YOUR COMMENTS