थौं एमाले सचिवालयया बैठक
बिस्कं मतय् सहलह जुइगु
येँ (नेपालभाषा टाइम्स)/ नेकपा एमालेया महासचिव शंकर पोखरेलं पुलांम्ह राष्ट्रपति विद्यादेवी भण्डारी सक्रिय राजनीतिइ वये मजिउगु व वय्कःया सदस्यता कायम मजुइगु पार्टीया निर्णययात कयाः नेतातय्सं तःगु बिस्कं मत बारे थौं च्वनीगु सचिवालय बैठकय् सहलह जुइगु खँ धयादीगु दु ।
म्हिगः पार्टी केन्द्रीय ज्याकू च्यासलय् ग्वसाः ग्वःगु पत्रकार सम्मे–लनय् सञ्चारकर्मीतय्सं तःगु न्ह्यसःया लिसः बीगु झ्वलय् महासचिव पोखरेलं उगु खँ धयादीगु खः ।
सञ्चारकर्मीतय्त लिसः बीगु झ्वलय् महासचिव पोखरेलं धयादिल, ‘नेतापिं युवराज ज्ञवाली व सुरेन्द्र पाण्डें पुलांम्ह राष्ट्रपति विद्यादेवी भण्डारी पार्टी राजनीतिइ लिहां वयेमजिउ व सदस्यता नवीकरण जूगु मदु धइगु निर्णयय् बिस्कं मत तयादीगु खः । थ्व खँ दस्तावेजयात कयाः बिस्कं मत मखु केन्द्रीय कमिटीया निर्णययात कयाः खः, अथे जुयाः थौं च्वनीगु सचिवालय बैठकय् उकियात कयाः सहलह जुइ ।’
उकथं हे महासचिव पोखरेलं निम्ह नेतातय्सं विचारय् मखुसे निर्णयलय् जक बिस्कं मत तःगु दाबी यासें निर्णय व दस्तावेजयात कयाः तइगु बिस्कं मत छगू हे जुइमखु धासें बिस्कं मतयात कयाः सहलह जुइगु थःगु हे विधि दुगु खँ नं धयादिल ।
उकथं हे वय्कलं गुगुं नं अधिवेशनय् तइगु बिस्कं मत सम्बन्धित अधिवेशनय् हे सहलह जुइगु पार्टी नियमावली दुगु धासें धयादिल, ‘सुनां नं बिस्कं मत तलधाःसा सम्बन्धित अधिवेशय् हे सहलह यायेगु जिमिगु वैधानिक व्यवस्था दु ।’
विधान महाधिवेशनय् बिस्कं मत वल धाःसा उगु हे इलय् सहलह जुइगु धासें वय्कलं आः वःगु बिस्कं मत निर्णयया जक जूगुलिं विधान अधिवेशय् सहलह मजुइगु खँ नं पोखरेलं धयादीगु दु । पत्रकार सम्मेलनय् महासचिव पोखरेलं स्थायी कमिटीया दुजः कर्ण थापां विधानयात कयाः असहमति प्वंकूगु धासें उकिया बारे नं सचिवालयं गुकथं सम्बोधन याइ धइगु बारे सहलह जुइगु खँ धयादिल ।
उकथं हे महासचिव पोखरेलं पुलांम्ह राष्ट्रपति विद्यादेवी भण्डारीया पार्टी सदस्यता लाका कयागु मखुसें परित्यागया विषय जूगु धासें धयादिल, ‘सदस्यता लाका कयागु मखु, परित्यागया विषय खः । परित्याग याःगु विषययात हाकनं कायम यायेगु कि मयायेगु धइगु खँया निर्णय पार्टीं याइ ।’
LEAVE YOUR COMMENTS