चैतया लिपांगु वालय् शाक्य समाजया अधिवेशन

येँ – राष्ट्रिय शाक्य समाजया प्यक्वःगु अधिवेशन थ्व हे वइगु चैतया लिपांगु वाःपाखे जुइगु जूगु दु । समाजपाखें छगू पत्रकार सम्मेलन यासें थ्व हे वइगु चैत २३ व २४ गते निन्हुयंकं जुइगु अधिवेशन यलय् यायेगु क्वःछिउगु दु । अधिवेशनय् नेपाःया थीथी स्वीखुगू जिल्लाया शाक्यपिंसं ब्वति काइगु समाजया महासचिव प्रा. सुवर्ण शाक्यं पत्रकार सम्मेलनय् जानकारी बियादीगु दु । शाक्य समुदायया देय् थकालि व दय् थकालि नकिंया प्रमुख आतिथ्यताय् जुइगु थुगुसीया ज्याझ्वलय् जन्मनिसें मृत्यु संस्कार तकया सांस्कृतिक विधि, व्यवहारय् सुधार, सांस्कृतिक नखःचखः व जात्रा पर्वया आवश्यकता, अनुगमन, सुधार नापं समाजया उद्देश्यलिसें आर्थिक, सामाजिक, शिक्षा व स्वास्थ्य सम्बन्धी योजनाय् थीथी विषयय् सहलह जुइगु पत्रकार सम्मेलनय् जानकारी बिउगु दु ।

यलया रुद्रवर्ण महाविहार ओकुबहालय् जुइगु अधिवेशनय् स्थानीय तह, प्रदेशसभा व प्रतिनिधिसभाय् निर्वाचित शाक्य जनप्रतिनिधियात हनेगु नापं थीथी जिल्लाया प्रतिवेदन नं पेस यायेगु ज्याझ्वः तयातःगु दु । न्हापांगु न्हिकुन्हु उलेज्या लिपा बन्द सत्रय् महासचिव व कोषाध्यक्षया प्रतिवेदन न्ह्यब्वयेगु व निन्हुया न्हिकुन्हु थीथी प्यंगू विषयय् ब्वथलाः पुचः सहलह यायेगु नापं उकुन्हु हे समाजया न्हूगु ज्यासना पुचः ल्ययेगु नं जानकारी बिउगु दु ।