चीनया विज्ञप्तिं नेपाःयात आपत !

येँ (नेपालभाषा टाइम्स)/चीनया सुरक्षा संगठनयात नेपालं समर्थन यात धकाः चिनियाँ पक्षं सार्वजनिक याःगु विज्ञप्तिं नेपाःयात मछिंगु अवस्थाय् लाका बिउगु दु । नेपाः–चीन दथुइ जूगु वार्ताया विवरणबारे जानकारी बीत चीनया विदेश मन्त्रालयं जारी याःगु विज्ञप्तिइ चीनं न्ह्यःने हयाच्वंगु ग्लोबल सेक्युरिटी इनिसियटिभ्स (जीएसआई) यात नेपालं समर्थन यात धकाः न्ह्यथनातःगु खः ।
चीनया थ्व विज्ञप्ति पिहां वयेवं नेपालय् उकिया कडा विरोध शुरु जूगु दु । देशय् विरोध जुइवं प्रम ओलीलिसे तुं भ्रमणय् दुथ्याःम्ह आर्थिक सल्लाहकार डा. युवराज खतिवडां प्रम ओलीं अज्याःगु बचं बिउगु मदु धकाः स्पष्टीकरण बियादिल । तर प्रम नापं तुं दीम्ह कांग्रेस नेता पूर्णबहादुर खड्कां धाःसा छुं न्ववाःगु मदुनि ।
नापं नेपाःया सुं प्रतिनिधिं चिनियाँ पक्षयात वनाः थुकिया खण्डन नं याःगु मदुनि । लिसें स्वयम् प्रम ओलीं नं थुकिया बारे छुं न्ववाःगु मदुनि । नेपालय् प्रमुख प्रतिपक्षी नेकपा (माओवादीं) थ्व खँय् चीनया विरोध वा ओलीया आलोचना याःगु मदुनि । निगू पक्षया निता हे खँ वःगु जुयाः थुकी बांलाक बुझे यानाः जक प्रतिक्रिया बीगु खँ माओवादीं धाःगु दु । अर्थात्, नेपालं थुकिया खण्डन याःसां चीनय् गनं नेपाली पक्षं समर्थनय् न्ववाःगु हे दु लाकि धइगु शंका माओवादीं यानाच्वंगु दु ।
उखे संसदया राज्य व्यवस्था समितिं नं थ्व खँय् चिउताः प्वंकूगु दु । नेपाःया प्रतिनिधि मण्डल नेपाः लिहां वयेवं थ्व बारे समितिइ खँल्हाबल्हा यायेगु खँ समितिं धाःगु दु ।
नेपालं चीनया सुरक्षा सरोकारयात समर्थन यात धकाः चीनं पिकाःगु थ्व समाचारयात भारतीय पक्षं धाःसा छुं प्रतिक्रिया बिउगु मदुनि । भारतीय सञ्चार माध्यम नं थ्व विषयय् अजूचायापुक मौन जुयाच्वंगु दु । चीनं पिकाःगु वक्तव्ययात प्रम ओलीया आर्थिक सल्लाहकारं खण्डन याःसां चीनं नं उकियात कयाः छुं टिप्पणी याःगु मदुनि ।