सम्पदा पदयात्रा बारे सहलह

ख्वप(नेपालभाषा टाइम्स)/ ख्वप नगरपालिकां थुगुसी नं सांस्कृतिक सम्पदा पदयात्रा याइगु जूगु दु । ख्वप नगरपालिकां दँय्‌दसं थें थुगुसी नं वइगु भदौ २२ गते सांस्कृतिक सम्पदा पदयात्राया ग्वसाः ग्वयेत्यंगु खः ।
ख्वप नगरपालिकाया प्रमुख सुनिल प्रजापतिया प्रमुख आतिथ्यताय् नगरपालिकां ग्वसाः ग्वयेत्यंगु सांस्कृतिक सम्पदा पदयात्रायात कयाः आः नकतिनि सरोकारावालालिसे छगू सहलह याःगु दु । उगु सहलह मुँज्याय् नवासें ख्वप नगर प्रमुख प्रजापतिं ख्वप देय्या पर्यटन प्रवद्र्धन यायेगु उद्देश्यं सम्पदा पदयात्रा, सांस्कृतिक प्रतियोगिता, ख्वप देय्या सांस्कृतिक गुरुया हनेज्या लगायत थीथी गतिविधि न्ह्याका वयाच्वनागु जानकारी बियाािदल । ख्वपया मौलिकताया संरक्षणं झीगु थःगु म्हसीकायात जीवन्त याना तयेत ग्वाहालि जुइ धासें वय्‌कलं ख्वपया मूर्त, अमूर्त सम्पदा संरक्षण यायेगु नापं थुकियात न्ह्यःने यंकेगु निंतिं कुतः जुयाच्वंगु खँ कनादिल । विश्व सम्पदाया धलखय् दुथ्यानाच्वंगु नेपाःया सम्पदा स्वयेत दँय्‌दसं विश्वया लखौं पर्यटकत नेपाः वयेगु यानाच्वंगु धासें ख्वपयात विश्वया हे उत्कृष्ट पर्यटकीय गन्तव्य दयेकेत नगरपालिकां नं थःगु थासं फक्व बः बियाा वयाच्वंगु वय्‌कःया धापू दु । वय्‌कलं नगरपालिकां ख्वपया सम्पदा पुनःनिर्माण, मर्मत यानाः संरक्षणया ज्यायात नं निरन्तरता बिया वयाच्वंगु खँ न्ह्यथनादिल ।
लिसें वय्‌कलं नगरपालिकाया ग्वसालय् जुइगु सां्रस्कृतिक सम्पदा पदयात्रा सकसिगुं मंकाः ज्याझ्वः जूगु खँ न्ह्यथनादिसें थुकियात अझ व्यवस्थित यानाः सफल यायेत सरोकारवाला सकलें नापं ख्वपया जनतां सकसिनं थःथःगु थासं फक्व ग्वहालि यायेत नं इनाप यानादिल ।
सहलह ज्याझ्वलय् ख्वप नगरपालिका पर्यटन सूचना तथा सेवा केन्द्रया प्रमुख गौतमप्रसाद लासिवां सांस्कृतिक सम्पदा पदयात्राया सम्भावित लँपु (रुट) व ज्याझ्वःया उद्देश्य बारे जानकारी बियादीगु खः ।
ज्याझ्वलय् थीथी पर्यटन व्यवसायी, पर्यटन व्यवसायलिसे सम्बन्धि सघसंस्थाया प्रतिनिधितय्‌सं सवारी साधनया उचित पार्किङ व्यवस्था, चःबिया व्यवस्था, पथप्रदर्शकतय्‌त बीमाःगु तालिम, खाद्य स्टल, जीवन्त सांस्कृतिक प्रदर्शनया व्यवस्थापन आदि बारे सुझाव बियादीगु खः ।
सहलह ज्याझ्वलय् भक्तपुर पर्यटन विकास समिति, होटल एशोसियसन भक्तपुर, भक्तपुर घरेलु तथा साना उद्योग संघ, भक्तपुर स्थानीय पर्यटन पथप्रदर्शक व्यवस्थापन समिति, पर्यटक प्रहरी, नेपाल आर्ट एण्ड काउन्सिल, भक्तपुर पर्यटन सद्भाव संघ लगायत पर्यटन ख्यःलिसें सम्बन्धित संघसंस्थाया प्रतिनिधितय् सहभागिता दुगु खः ।