धर्मकीर्ति विहारय् महापरित्राण ज्याझ्वः

येँ(नेपालभाषा टाइम्स)/ थनया सीघःस्थित धर्मकीर्ति विहारय् पवित्र महापरित्राण पाठ ज्याझ्वः जु । वंगु यंलाथ्व तृतिया (भदौ १० गते) मंगलवाः उगु ज्याझ्वः जूगु खः ।
विहार प्रमुखलिसें धम्मानुशासक श्रद्धेय धम्मावति गुरुमांया ९२ दँ बुन्हिया लसताय् वसपोलया भिं–उसाँय्या कामना यासें गुरुमांपिं जक च्वनाः पवित्र महारित्राण पाठ ज्याझ्वः जूगु खः । विहारया तता पुचःया ग्वसालय् उगु महापरित्राण पाठ ज्याझ्वः जूगु खः । ज्याझ्वः स्वयां न्ह्यः पुचःया सकलें जःपिंसं वसपोल तथागत भगवान बुद्धया मूर्ति छ्यनय् तयाः सीघः चैत्य चाःहिलाः महापरित्राण मन्दप न्ह्यःने बिज्याकूगु खः ।
वयां लिपा श्रद्धेय धम्मावति गुरुमांपाखें महापरित्राण मण्डपय् तयातःगु रिवन चायेकाः दुहां बिज्यासे दकलय् न्हापां वसपोलं हे पाठ याना बिज्याःगु खः । लिसें वसपोल धम्मावति गुरुमापाखें धर्मदेशना नं बियाबिज्याःगु खः ।
ज्याझ्वःकथं दकलय् न्हापां सकल गुरुमांपिंपाखें मंकाःकथं अनंलि निम्ह निम्ह गुरुमां व वयां लिपा प्यम्ह गुरुमांपिंसं मंकाःकथं परित्राण पाठ यानाबिज्याःगु खः ।
महापरित्राण पाठ लिपा विहारया ३७ म्हेसिया तता पुचःया सकल जः, उपासक उपासिकापिंसं श्रद्धेय अनागारिका गुरुमांपिंत दान प्रदान याःगु खः ।
ज्याझ्वःया दकलय् लिपांगु ब्वय् महापरित्राण जल व परित्राण का प्रदानयासें पुण्यानुमोदन यानाः ज्याझ्वः क्वचायेकूगु खः ।