ने. सं. ११४६ चाैलागा आमै - माँया ख्वाःस्वयेगु

लिपुलेक सम्झौतायात नेपालय् कडा विरोध

येँ /नेपाल समाजवादी पार्टी (नयाँ शक्तिं) भारत व चीन दथुइ वंगु भदौ ३ गते नेपाःया पूर्वसहमति मकासे लिपुलेक नाका व्यापार प्रयोजनया निंतिं सञ्चालन यायेगु सम्झौतायात आपत्ति प्वंकूगु दु ।
उगु पार्टीं पिथंगु विज्ञप्तिइ सन् २०१५ सं भारतीय प्रधानमन्त्रीया चीन भ्रमणया झ्वलय् बेइजिङय् जूगु सहमतिं हे लिपुलेक भारत–चीन व्यापारिक मार्गया रुपय् छ्यलेगु कुतः जूगु व उकियात कयाः तत्कालीन इलय् नेपाल सरकारं कुटनीतिक असहमति प्वंकाः निगुलिं देय्यात भिंकेत औपचारिक नोट छ्वःगु तर दुःखया खँ, नेपाःया थ्व विषयसं स्पष्ट आपत्ति जुइक जुइकं नं भारत व चीनं हाकनं उगु हे गल्ती दोहोरे यायेगु, नेपाःया सार्वभौमिकता व भौगोलिक अखण्डता प्रति गम्भीर उपेक्षा व अपमान जूगु खँ नं न्ह्यथनातःगु दु ।
उकथं हे विज्ञप्तिइ यकःति याःगु थज्याःगु पलाःयात अस्वीकार यासें थ्व जःलाखःला देय्या हेपाहा प्रवृत्तिया प्रतिबिम्ब जूगु धासें नेपाल सरकारं कुटनीतिक सक्रियतां व दृढताय् खनेदुगु कमजोरीं नं सीमा व राष्ट्रिय हितया संवेदनशील न्ह्यसःयात अझ जटिल याःगु ठहर जूगु खँ नं धयातःगु दु ।
उकथं हे वैज्ञानिक समाजवादी कम्युनिष्ट पार्टीं नेपाःया भूमि लिपुलेक छ्यलाः भारत व चीनं याःगु व्यापार सम्झौता लित कायेत इनाप याःगु दु । पार्टी महासचिव विश्वभक्त दुलाल
(आहुतिं) म्हिगः विज्ञप्ति जारी यासें नेपाःया भूमियात कयाः थुकथं निर्णय यायेगु अधिकार भारत व चीन निगुलिं देय्यात मदुगु खँ धाःगु दु ।
विज्ञप्तिइ धयातःगु दु, ‘थ्व घटना नेपाःया सार्वभौमसत्ता व भौगोलिक अखण्डताय् साम्राज्यवादी आक्रमण खः धइगु खँय् जिमिगु पार्टी स्पष्ट दु । यदि थ्व आपत्तिजनक सहमति लित मकाल धाःसा जिपिं कडा प्रतिरोधय् कुहां वयेत बाध्य जुइ । लिसें, थज्याःगु कथंया राष्ट्रियता स्वाधीनता विरोधी पलाःया विरुद्ध छप्पँ जुइत सकलें नेपाःमितय्‌त इनाप नं यानाच्वना ।’
थ्वहे झ्वलय् प्यंगू दलीय समाजवादी मोर्चां नं नेपाःया भूमि लिपुलेक कालापानीया भूभाग लित हयेत कुतः यायेत सरकारयाके माग याःगु दु । मोर्चां म्हिगः विज्ञप्ति जारी यासें भारत व चीन दथुइ पुलानगुन्जीयात स्वाइगु लिपुलेक व्यापारिक नाका सुचारुया निंतिं निगू पक्षीय व्यापार पुनर्स्थापना यायेगु समझदारी प्रति गम्भीर ध्यानाकर्षण जूगु धासें सरकारयात उगु माग याःगु खः ।
मोर्चां जारी याःगु विज्ञप्तिइ धयातःगु दु, ‘ऐतिहासिक प्रमाण व निगू पक्षीय सन्धिं लिपुलेक, लिम्पियाधुरा व कालापानी क्षेत्र नेपाःया अभिन्न अंग खः धइगु पुष्टि याइ । नेपाःया अभिन्न भूभागया रुपय् दुगु उगु क्षेत्रय् वंगु छुं ई निसें भारतीय पक्ष अतिक्रमण जारी दु । थ्व विषयसं नेपालं कुटनीतिक कुतः यानाः नेपाःया भूभाग लित हयेगु माःगु कुतः जुइ फयाच्वंगु मदु ।’