ने. सं. ११४६ चाैलागा आमै - माँया ख्वाःस्वयेगु

फास्ट ट्रयाकया जिरो किलोमिटरय् जग्गा अधिग्रहण

येँ/रक्षा मन्त्रालयं नेपाली सेनाया व्यवस्थापनय् न्ह्यानाच्वंगु येँ–निजगढ दु्रतमार्ग (फास्ट ट्य्राक)या मू समस्या धयागु जिरो किलोमिटर निर्धारण व जग्गा प्राप्ति जूगु खँ धाःगु दु । मन्त्रालयं आर्थिक दँ २०८१/८२ या प्यक्वःगु त्रैमासिक प्रगति समीक्षा व मन्त्रालयस्तरीय विकास समस्या समाधान समितिया बिहिवाः च्वंगु बैठकय् ख्वनाया जग्गा अधिग्रहण सम्बन्धी समस्यां दू्रतमार्गया जिरो किलोमिटर निर्धारण व सवारी आवागमन व्यवस्थापन सम्बन्धय् निर्णय याये ल्यं दनिगु जानकारी बिउगु खः ।
मन्त्रालयया प्रगति समीक्षा प्रतिवेदनय् धयातःगु दु, ‘दु्रतमार्गया प्रस्थान विन्दुनिसें ६.५ किमि दुने लाःगु प्याकेज नं. ११ य् जग्ग अधिग्रहण सम्बन्धी समस्या दुगु व प्रस्थान विन्दु व सवारी आवागमन सम्बन्धय् निर्णय मजूगुलिं उगु खण्डया ज्या न्ह्याके मफयाच्वंगु अवस्थाय् दु ।’
थुगु आयोजनाया वंगु आर्थिक दँय् ६७.५ प्रतिशत भौतिकपाखे वार्षिक लक्ष्य प्राप्ति जूगु धाःगु दु । जिरो किलोमिटर सम्बन्धी निर्णय याये ल्यंदनिगुलिं उगु खण्डया खरिद व निर्माण ज्या प्रभावित जुयाच्वंगु मन्त्रालयं धाःगु दु । अथे खःसां दूू्रतमार्गया सुरु विन्दु व सवारी आवागमन व्यवस्थापन सम्बन्धय् विस्तृत सम्भाव्यता अध्ययन जुयाः प्रतिवेदन जुइधुंकूगु दु । सुरु विन्दु व सवारी आवागमत व्यवस्थापनया विषयय् याकनं निर्णय जुइमाःगु मन्त्रालयया धापू दु ।
थगुने तसकं वा वःगु कारणं छुं थासय् भौगोलिक हिउपाः वःगुलिं न्हूगु अध्ययन व डिजाइन यायेमाःगु व निर्माण व्यवसायीपाखें माक्व दक्ष्य जनशक्ति खटे मयाःगु कारणं लक्ष्य कथं वित्तीय व भौगोलिक प्रगति चूलाकेमफुगु मन्त्रालयं स्पष्ट याःगु दु ।
रक्षामन्त्री मानवीर रार्इं आःतकया आयोजनाया भौतिक प्रगति विश्लेषण यायेबलय् दु्रतमार्गया निर्माण ज्यायात लक्षित ई दुने क्वचायेकेत थप मेहनत याये आवश्यक दुगु खँ धाःगु दु । मन्त्री राईं आयोजना लिबात धाःसा लागत अप्वइगु जक मखु वर्तमान पुस्ता उकिया प्रतिफल उपभोग यायेत तकं बञ्चित जुइगुलिं सकसिनं मंकाः कुतः व पहल याये आवश्यक दुगु खँ धाःगु दु ।
यलया ख्वना क्षेत्रयात प्रस्थान विन्दु धया वयाच्वंगु व अन्तिम विन्दू निजगढ क्वःछिनातःगु थ्व आयोजनाया दूरी ७०.९७७ किमि दु । थ्व आयोजनाया आःतकया समष्टि प्रगति ४२.१३ व वित्तीय प्रगति ४४ प्रतिशत जक दु । थौंकन्हय् न्हिं २ हजार ८२ म्हेसित रोजगारी बिया वयाच्वंगु थ्यंमथ्यं निगू खर्ब ११ अर्ब ९३ करोड लागतया उगु आयोजना वि.सं. २०८३ चैत मसान्त तक पूवंकेगु लक्ष्य क्वःछिनातःगु खः ।
बैठकय् राष्ट्रिय योजना आयोगया उपाध्यक्ष प्रा. डा. शिवराज अधिकारीं राष्ट्रिय गौरव व प्राथमिकताय् तयातःगु आयोजना छनोट व निर्धारणय् अप्वः सचेतना नालेमाःगु व लक्ष्य कथं आयोजना पूवंके मफुगुया कारण व समन्वय यानाः न्ह्या वनेमाःगु पलाः बारे निर्मम समीक्षा यायेमाःगु खँ धाःगु खः ।
अथेहे प्रधान सेनापति अशोकराज सिग्देलं आयोजना व कार्यक्रमयात न्ह्याकेगु झ्वलय् खनेदुगु ढिलासुस्ती व कमीकमजोरी चिइका यंकेमाःगु आवश्यक दुगु बिचाः तःगु खः । अथेहे मन्त्रालययासचिव रामेश्वर दंगालं लक्ष्य निर्धारण यानातःकथं भौतिक प्रगति व पुँजीगत खर्च मजूगुपाखे गम्भीर समीक्षा यानाः वइगु इलय् थज्याःगु समस्या हाकनं मवयेकेगु बचं ल्हानाः कार्ययोजना व अनुगमनयात चुस्त यायेमाःगु खँ धयादिल ।