पुलांम्ह राष्ट्रपति विद्या भण्डारीं बिया हल राजनीतिक भाषण
येँ/पुलांम्ह राष्ट्रपति विद्या भण्डारीया लागिं एमालें राजनीतिया लुखा बन्द याःसां भण्डारीं धाःसा थःगु पलाः दिकूगु मदुनि । थः राजनीतिइ सक्रिय जुइगु हे ताः तयाः हानं सक्रिय याःगु मदन भण्डारी फाउण्डेशनया ज्याकू चायेकाः म्हिगः वय्कलं उकिया उलेज्या यानादिल ।
उलेज्या समारोहय् न्ववायेगु झ्वलय् पुलांम्ह राष्ट्रपति भण्डारीं राजनीतिक भाषण समेत बियादीगु दु ।
उलेज्या समारोहयात सम्बोधन यासें वय्कलं थः निरन्तर नेकपा एमालेय् सक्रिय कार्यकर्ताया रुपय् ज्या यानाच्वनागु व थम्हं राजनीति सुरु यानागु इलय् एमाले धाःगु पार्टी हे जन्मे मजूनि धयादिल ।
वय्कलं थः आलोचनापाखें पिने मखु तर आलोचना तथ्यय् आधारित जुयाः यायेमाः धयादिल । थःत पासापिंसं नेता खः धायेगु याःसां एमालें धाःसा थःगु सदस्यताय् हे न्ह्यसःचिं थंगु धासें उकी दुःख नं प्वंकादिल ।
लिसें वय्कलं देशया अर्थतन्त्र नाजुक जुयाच्वंगु खँ न्ह्यथँसें थौंकन्हय् आयातय् आधारित भन्सार कयाः देश चले जुयाच्वन धकाः राजनीतिक बिचाः नं तयादिल ।
ज्याझ्वलय् एमालेया वरिष्ठ उपाध्यक्ष ईश्वर पोखरेलं नं न्ववानादीगु खः । अन न्ववासें पोखरेलं एमालेया अध्यक्ष केपी ओली गुगु इलय् विचारया प्रखरताया ध्वाँय् ज्वनाः न्ह्याःवंगु खः उगु इलं निसें मदन भण्डारी फाउण्डेशनलिसे स्वाःगु व ओलीया कारणं हे फाउण्डेशनं महत्वपूर्ण भूमिका म्हितूगु खः धयादिल ।
उकथं हे वय्कलं मदन भण्डारीं हःगु जनताया बहुदलीय जनवादया विचाः गुगुं मौसमी व चटके ल्याखं हःगु मखु धकाः नं धयादिल । वय्कलं मदन भण्डारीया ७५ दँ बुन्हि न्यायेकेगु लागिं ज्यायात व्यवस्थित यायेगु लागिं थ्व सम्पर्क कार्यालय चायेकूगु खँ नं स्पष्ट यानादिल ।
भण्डारीया उगु ज्याकू उलेज्या समारोहय् ईश्वर पोखरेल लगायत एमालेया मेपिं उपाध्यक्षपिं सुरेन्द्र पाण्डे व युवराज ज्ञवाली नं उपस्थित जुयादीगु खः ।
विद्या भण्डारीं मदन भण्डारी फाउण्डेशनया नामं बिस्कं ज्याकू हे चायेकूगु कारणं आः वय्कलं एमाले लिसे समानान्तर गतिविधि याये फइगु अनुमान याना हःगु दु ।
LEAVE YOUR COMMENTS