मगः समुदायया नं लाखे पिहां वल
येँ/लाखेप्याखं नेवाःतय् मौलिक संस्कृति खः । मूलतः लाखेप्याखं धायेवं थ्व नेवाःतय् बाहुल्यता दुगु थासय् नेवाःतय्सं हे संगठित रुपं पिथनाः क्यनेगु याना वयाच्वंगु दु । देशय् दुने थीथी जिल्लाय् जक मखु, देशं पिने नं नेवाःतय्सं लाखे प्याखं प्रदर्शन याना वयाच्वंगु दु । नेवाःत गन गन ख्वाःतकु बसोबास यानाच्वंगु दु, अन अन हे नेवाःतय्सं लाखेप्याखं पिथनाः क्यनेगु याना वयाच्वंगु दु ।
मुख्य रुपं नेवाःतय्गु थःगु हे बिस्कं मौलिक संस्कृतिया रुपय् दुगु लाखेप्याखं लिपांगु इलय् नेवाः मखुपिंसं नं पिथनाः क्यनेगु यानाहःगु दु । पाल्पा जिल्लाया निस्दी गाउँपालिका – ५ मुख्य रुपं मगः समुदायया बाहुल्यता दुगु थाय् खः । थ्व हे निस्दी गाउँपालिका ५या बेलौजी धइगु थासय् मगः समुदायं लाखेप्याखं पिथनाः क्यनेगु याना वयाच्वंगु दु, व नं हालय् जक मखुसे झण्डै खुगू दशक (५८ दँ) न्ह्यवंनिसें निरन्तर लाखेप्याखं पिथनाः क्यना वयाच्वंगु दु ।
मुक्कं ३६ खा छेँया वस्ती दुगु बेलौजीया स्थानीयं मगःतय्सं दँय्दसं लाखेप्याखं क्यना वयाच्वंगु दु । स्थानीय हुमबहादुर सुनारी व लालबहादुर बयम्बुं २०२३ सालपाखे लाखेप्याखं क्यनेगु शुरु याःगु खः । पूर्वखोला–१, सिलुवा माझकोटया छगू गामय् लाखेप्याखं स्वःगु इलय् न्ह्यइपुसे च्वनेवं थःपिनिगु गामय् नं लाखेप्याखं क्यनेगु शुरु याःगु खः । थौंकन्हय् ७८ दँ दुम्ह सुनारीं थःगु हे नेतृत्वय् लाखेप्याखं क्यनेगु याना वयाच्वंगु दु ।
न्हापांगु दँय् थःपिंसं हे ख्वाःपाः दयेकाः सःसः थे प्याखं क्यनेगु शुरु यानागु व दछि लिपा सिलुवाया विष्णु श्रेष्ठसहितया पुचःया सःताः ख्वाःपाः दयेके बियागु, लाखेंप्याखं छायेपीगु, बाजं व प्याखं स्यनेगु नापं पुजा विधि तकं पूवंकाः दँय्दसं लाखेप्याखं क्यना वयाच्वनागु वय्कलं कनादिल ।
LEAVE YOUR COMMENTS