उपसभामुख चीकेगु विवादं कांग्रेसय् कचवं
येँ/सत्तारुढ दल एमाले व कांग्रेसं उपसभामुख इन्दिरा राना मगरयात चीकेगु निंतिं हस्ताक्षर मुंकूसां तत्काल दर्ता धाःसा मयाइगु जूगु दु । थ्व स्वयां न्ह्यः नं उपसभामुख मगरयात चीकेगु कुतः याःगु खः। मगरं निदँत्या न्ह्यः अमेरिकी राजदूतावासय् च्वःगु छपु पौया खँयात कयाः वय्कःयात चीकेगु कुतः जुयाच्वंगु खः ।
संवैधानिक परिषदय् सत्तारुढ दलया पक्षय् बहुमत दयेकेगु लागिं उपसभामुख मगरयात चीकेगु कुतः जुयाच्वंगु खँ धाःगु दु । संवैधानिक परिषदय् उपसभामुख नं दुजः जुइ । वर्तमान उपसभामुख मगर रास्वपाया दुजः । थौंकन्हय् रास्वपा सरकारया विपक्षय् दुगुलिं वय्कःयात चीकाः संवैधानिक परिषदय् थःपिनि बहुमत दयेकेगु कुतः सरकारं यानाच्वंगु खँ धाःगु दु ।
संवैधानिक परिषदय् प्रधानमन्त्री अध्यक्ष जुइसा प्रतिनिधिसभाया सभामुख, राष्ट्रियसभाया अध्यक्ष, प्रधानन्यायाधीश, प्रतिनिधिसभाया उपसभामुख व प्रमुख प्रतिपक्षी दलया नेता पदेन दुजः जुइ । परिषदय् आःया समीकरण कथं सत्तापक्षया बहुमत मदु । उपसभामुख छम्ह चीकल धाःसा बहुमत दइ । थःगु बहुमत मदुगुलिं सरकारं थीथी संवैधानिक निकायया खालीगु पद पूर्ति याये फयाच्वंगु मदुनि ।
थ्वहे झ्वलय् नेपाली कांग्रेसया नेता शेखर कोइराला पक्षं उपसभामुखयात चीकेत्यंगु खँय् असन्तुष्टि प्वंकूगु दुसा संसदय् दुपिं विपक्षी दलतय्सं नं थुकिया विरुद्ध सशक्त प्रतिकार यायेगु निष्कर्ष पिकाःगु दु । प्रमुख प्रतिपक्षी दल नेकपा माओवादी संसदीय दलया ज्याकुथिइ म्हिगः च्वंगु विपक्षी पार्टीतय् बैठकं थ्व खँयात थौं च्वनीगु प्रतिनिधिसभाया बैठकय् नं ल्ह्वनेगु निर्णय याःगु दु ।
उकथं हे नागरिक उन्मुक्ति पार्टीया अध्यक्ष रञ्जिता श्रेष्ठं नं उससभामुख विरुद्धया प्रस्तावय् हस्ताक्षर यायेगु खँय् निर्णय मजूनिगु खँ धयादीगु खः । म्हिगः सत्तापक्षया बैठकय् पार्टी अध्यक्षया हैसियतं अध्यक्ष श्रेष्ठं नं ब्वति कयादीगु खः ।
थ्वहे झ्वलय् एमालें स्वनिगलं पिने वनाच्वंपिं सांसदतय्त स्वनिगलय् वयेत व स्वनिगलय् दुपिं सांसदतय्त स्वनिगः मत्वःतेत निर्देशन बिउगु दु ।
LEAVE YOUR COMMENTS