राससयात देय् दबू व पत्रकार दबूया सुभाय्

येँ (नेपालभाषा टाइम्स)÷ नेपाःया छगू जक समाचार एजेन्सी राष्ट्रिय समाचार समितिं (राससं) नेपालभाषा व मैथिली भासं नं बुखँ बिउगुयात कयाः नेवाः देय् दबुलिं सुभाय् बिउगु दु । देय् दबुलिं छगू विज्ञप्ति जारी यासें समावेशी समाज दयेकेगु आज्जु तयाः देशय् पलिस्था जूगु संघीय लोकतान्त्रिक गणतन्त्रयात स्थायीत्व बीगु निंतिं राससं न्ह्याकूगु थुगु ज्यां तिबः काइगु भलसा कया धासें थुगु ज्याय् नेतृत्व याःपिं सकलसित सुभाय् देछाया धाःगु दु ।

‘नेपाः छगू बहुभाषिक देय् जूगुलिं बहुभाषिक झीगु विशेषता व राष्ट्रियताया आधार खः । थुगु बहुभाषिकता दथुइ राष्ट्रिय एकता धिसिलाकेगु झीगु दायित्व खः । राससं न्ह्याकूगु थुगु पलाखं थुगु दायित्व पूवंकेगुलिइ ईल्वहं धस्वाकेगु ज्या जूगु दु । थुकिं देशय् बहुभाषिक पत्रकारिताया विकास यायेगु ऐतिहासिक योगदान जूवनीगु निश्चित दु’ वक्तव्यय् धयातःगु दु ।

अथेहे नेवाः पत्रकार राष्ट्रिय दबुलिं नं छगू वक्तव्य पिकासें राससं नेपालभाषा व मैथिली भासं बुखँ प्रकाशन सुरु याःगुलिं थःपिं लय्ताःगु खँ धाःगु दु । देय्या हे दकलय् पुलांगु समाचार प्रेषण याइगु मुख् समाचार समितिया थ्व पलाः ऐतिहासिक जूगु न्ह्यथँसें दबुलिं नेपालभाषां पत्रकारिता सुरु जूगु सछि दँ क्यंगु व संयुक्त राष्ट्र संघं भाषा दशक हनाच्वंगु इलय् थ्व ज्या जूगुलिं थःपिं झन उत्साहित जूगु खँ धाःगु दु ।

पत्रकार दबुलिं राससया थ्व पलाखं राससयात व्यापक व अपनत्व दयेकेत सकारात्मक भूमिका म्हितीगु विश्वास प्वंकुसें थ्व ज्या न्ह्याकेत ज्या यानादीपिं राससया सकल पदाधकारी व जःपिंत सुभाय् देछागु दु । अथेहे दबुलिं राससं पिथनाच्वंगु थीथी भाय्या बुलेटिन सम्बन्धित भाय्या सञ्चार माध्यमतय्त सुचीकृत यानाः निःशुल्क उपलब्ध याकेगु व्यवस्था यायेत नं इनाप याःगु दु ।