ने. सं. ११४६ सिल्लाथ्व दुतिया -

येँयाःया निंतिं व्यवस्थापन समिति व मूल समारोह समितिया दथुइ सहलह

येँ(नेपालभाषा टाइम्स)- येँयाः नखःयात कयाः निगू समितिया दथुइ सहलह जूगु दु । येँयाः (इन्दजात्रा) व्यवस्थापन समिति व येँ महानगरपालिकां नीस्वनातःगु येँयाः (इन्द्रजात्रा) मूल समारोह समिति दथुइ सहलह जूगु खः ।
येँ महानगरपालिका सहरी योजना आयोगया सभाकक्षय् निगुलिं समितिया पदाधिकारी दथुइ येँया जात्रा संचालन, व्यवस्थापनलिसें समन्वयया विषयय् केन्द्रीत जुयाः सहलह जूगु खः ।

सहलहया हे झ्वलय् थगुने जात्रा संचालनया झ्वलय् जूगु थीथी क्रियाकलाप, गतिविधि, खर्च आदि विषयय्् समीक्षा याःगु खः । लिसें थुगुसी जात्रायात स्वचालित यायेगु नापं गुथियार, साझेदारतय्त प्रोत्साहन यायेगु, श्रद्धालु, जात्रा अवलोकनकया निंतिं वइपिंत सहज रुपं जात्रा स्वयेगु वातावरण दयेकेगु विषयय् नं बैठकय् सहलह जूगु दु ।

येँ महानगरपालिकां नीस्वनातःगु येँयाः (इन्द्रजात्रा) मूल समारोह समितिया संयोजक आशामान संगतं खर्च मदुगु हे कारणं जात्रा दिकेमाःगु वा क्रियाकलाप रोके याये मालीगु अवस्था वयेके मबीगु खँ धयादीगु दु । थ्व स्वयां न्ह्यः खर्चया अभावया कारणं रोके जूगु येँयाः क्रियाकलायात थुगुसीनिसें पुनःस्थापना यायेगु जुइ धासें राष्ट्रिय पर्व थेंज्याःगु जात्राया गुगुं नं क्रियाकलाप रोके यायेगु खँ जुइमखु धयादिल ।

थःगु भौगोलिक क्षेत्र दुने संचालन जुइगु दक्वं जात्रा पर्वया गतिविधि, क्रियाकलाप महानगरपालिकां अभिभावकत्व ग्रहण याइगु नं वय्कलं धयादिल । व्यवस्थापन समितिया अध्यक्ष गौतमरत्न शाक्यं महानगरपालिका व व्यवस्थापन समिति छगू हे थासय् च्वनाः जात्रा सहज, व्यवस्थित व सभ्य रुपं संचालन यायेगु जुइ धयादिल । समितिया उपाध्यक्ष दीपकप्रसाद श्रेष्ठं इलय् निर्णय जुल धाःसा जात्राया गतिविधिया तयारी यानाः व्यवस्थित रुपं संचालन याये फइगु खँ धयादिल ।

थ्व हे झ्वलय् थुगुसीया येँयाःया औपचारिक ज्या न्ह्याःगु दु । म्हिगः यंलाथ्व दुतियाकुन्हु सुथय् वन यात्रा यानाः म्हिगः हे यःसिं पालेगु ज्या नं जुइधुंकूगु दु । कन्हय्तकया दुने यःसिं भोताहितिइ थ्यंके हइगु व अनंलि कायाःस्तमिकुन्हु यःसिं नगर प्रवेश धकाः हनुमानध्वाखाय् यंकी । वइगु यंलाथ्व द्वादशिकुन्हु यःसिं थनेवं येँयाः न्ह्याइ ।