ने. सं. ११४६ अनलाथ्व चतुर्दशी -

अमेरिकाया पुलांम्ह राष्ट्रपतियात गोली प्रहार, जवगु न्हाय्पनय् गोली लाःम्ह ट्रम्प सुरक्षित

वाशिंगटन – अमेरिकाया पुलांम्ह राष्ट्रपति डोनाल्ड ट्रम्पयात गोली प्रहार याःगु दु । शनिवाः पेन्सिलभेनियाय् ग्वसाः ग्वःगु छगू चुनावी सभाय् ट्रम्पयात गोलीं कयेकूगु खः । घटना लगत्तै ट्रम्पयात सुरक्षाकर्मीतय्सं उगु पित हःगु खः ।

वइगु नोभेम्बर महिनाय् जू वनाच्वंगु राष्ट्रपति पदया निंतिं रिपब्लिकन उम्मेदवार ट्रम्पया हत्या यायेगु नियतं हे गोली प्रहार याःगु आशंका याःगु दु । जवगु न्हाय्पनय् गोलीं लाःम्ह ट्रम्प धाःसा सुरक्षित दुगु अन्तर्राष्ट्रिय संचारमाध्यमतय्सं न्ह्यथंगु दु ।

पुलांम्ह राष्ट्रपति ट्रम्पं नं थःगु सामाजिक संजाल ‘टु«थ’य् छगू सन्देश जारी यासेंं थःत जवगु न्हाय्पनय् गोलीं लाःगु धासें गुप्तचर निकाययात सुभाय् देछाय् घटना सीम्हप्रति विचाः हायेकादीगु दु ।
अमेरिकी गुप्तचर निकायं ट्रम्पया जुलुसया पिनेया उच्च स्थानं गोली प्रहार याःगु खँ धाःगु दु । शनिवाः पेन्सिलभेनियाया बटलरय् चुनावी ¥यालीया झ्वलय् स्थानीय ईकथं सनिलया करिब सवा ६ बजे छम्ह संदिग्ध बन्दुकधारीं चुनावी ¥याली जुयाच्वंगु थासं पिने उच्च थासं आपालं गोलीं कयेकूगु गुप्तचर निकायपाखें जारी याःगु विज्ञप्तीइ धयातःगु दु ।

गुप्तचर सेवा विभागया कर्मचारीतय्सं अमेरिकी गोप्य सेवां तत्काल सुरक्षात्मक उपाय नाला काःगु पुलांम्ह राष्ट्रपति ट्रम्प सुरक्षित जूगु धासें गोलीकाण्डय् जुलुस स्वयाच्वंम्ह छम्ह सीगु व मेपिं निम्ह गम्भिर घाःपाः जूगु खँ धाःगु दु ।

बाइडेन प्रशासनया बारे नवनाच्वंगु इलय् छुं मुया वःगु थें सः ताये दुगु व लिपा छुकिया सः धकाः सीकेगु कुतः यानाच्वँच्वं हे ट्रम्पया न्हाय्पनं हि बाः वयाच्वंगु समाचार संस्था बीबीसींं न्ह्यथंगु दु । गोलीं लायेवं ट्रम्प तत्काल पोडिएम लिउने पुलिं चुयाः च्वंगु खःसा वया लिउने च्वनाच्वंपिं समर्थकत नं ट्रम्प लिउने च्वं वंगु खः । लिपा अन दुपिं गुप्तचरत वयाः ट्रम्पयात प्यखेरं घेरे याःगु खः । न्हापां थःत गोलीं लाःगु वाः मचाःसां पोडियमपाखें दंगु इलय् वयागु न्हाय्पनं हि बाः वयाच्वंगु खः । अथे खःसां ट्रम्पं ल्हाः म्हू चिनाः ¥यालीइ वयाच्वंपिं समर्थकया उत्साह थकायेगु ज्या याःगु खः ।

घटनास्थलया किपाय् ट्रम्पया न्हाय्पनय् हि खने दुसा न्यताः व म्हुतुइ नं हि लानाच्वंगु खनेदु । ट्रम्पं ¥यालीयात संबोधन याये न्ह्यः छम्ह समर्थकं संदिग्ध छम्ह मनू मञ्च लिक्कसं च्वंगु छखा छेँय् वंगु खंगु खः । उम्ह समर्थकं सुरक्षाकर्मीयात उम्ह संदिग्ध राइफललिसें घ्वंघ्वं स्यानाः वंगु खंगु सुचं बिउगु खःसा लिपा अन उपस्थित सुरक्षाकर्मी गोलीं कयेकूगु गोलीं संदिग्ध सीगु समाचारय् धयातःगु दु । प्रत्यक्षदर्शीतय्कथं ट्रम्पयात करिब ३०० यार्ड तापाकं राइफलपाखें गोली कयेकूगु खः ।

गोलीं कयेकूम्ह संदिग्ध राइफलसहित उगु थासय् गुकथं वन धइगु बारे अनुसन्धान जुयाच्वंगु समाचारय् धयातःगु दु ।