ने. सं. ११४४ कौलाथ्व चौथी -

हानं सरकार हीकेगु चलखेल

येँ (नेपालभाषा टाइम्स)- माओवादी केन्द्र व एमाले जानाः गठन जूगु वर्तमान सरकार हानं हिलीगु सम्भावना म्हिगःनिसें तीव्र जुया वंगु दु । एमाले अध्यक्ष केपी ओलीलिसे म्हिगः कांग्रेस सभापति शेरबहादुर देउवा व वय्कःया जहान आरजु देउवा वनाः नापलाःगु, अले म्हिगः केपी ओली वालुवाटार वनाः प्रधानमन्त्री दाहालयात नापलाःगु घटनाया नापनापं देय्या राजनीतिइ हानं हलचल वइगु संकेत खने दया वःगु दु ।

सूत्रतय्सं धाःकथं आःया हिउपाः एमाले अध्यक्ष केपी ओलीया नेतृत्वय् न्हूगु सरकार गठन यायेगु ज्याखँया जःखः चाःहिलाच्वंगु दु । खास यानाः नकली भूटानी शरणार्थी काण्डय् नां वःसां नं बेपत्ता जुयाच्वंम्ह अभियुक्त बेचेन झायात प्रहरीं ज्वनेवं राजनीतिइ हलचल वःगु आशंका याना हःगु दु । नकली भूटानी शरणार्थी काण्डया मू नायक थें जुयाच्वंम्ह झापाखें आः आरजु देउवाया नां समेत पोले याये फइगु खतरा खंकाः म्हीग आरजुयात हे ज्वनाः देउवां ओलीयात नापलाःगु खः । उगु इलय् आः ओलीया नेतृत्वय् कांग्रेस समेत जानाः सरकार गठन यात धाःसा अज्याःगु गठबन्धन थःत स्वीकार्य जूगु बचं देउवां बियाथकूगु चर्चा दु ।

देउवापाखें अज्याःगु बचं वयेवं ओलीं आः थःगु हे नेतृत्वय् न्हूगु सरकार गठनया लागिं तयारी याःगु चर्चा पिने खने न्यने दया वःगु खः । थ्व झ्वलय् ओलीं सरकारया नेतृत्व थम्हं यायेगु खःसां उकी कांग्रेस, माओवादी, रास्वपा लगायत फुक्क हे दल दुथ्याकाः राष्ट्रिय सरकार दयेकेगु प्रस्ताव न्ह्यःने हःगु खँ सीदुगु दु । छुं जुयाः अज्याःगु राष्ट्रिय सरकार गठन याये मफुत धाःसा कांग्रेस व एमाले जक जानाः जूसां सरकार दयेकेगु कुतः ओलीपाखें यायेत्यंगु नं चर्चा दु ।

थःगु न्हूगु योजनाबारे खँ ब्याकेत म्हिगः ओलीं पार्टीया वरिष्ठ नेतात जक च्वनाः पार्टी कार्यालयय् गोप्य छलफल यानादीगु खःसा वयां लिपा सरकारय् वनाच्वंपिं थःगु पार्टीया मन्त्रीतय्त वालुवाटार सःतादीगु खः ।