यलय् सत्यमोहन एकेडेमी दयेकीगु

यल (नेपालभाषा टाइम्स)- यल महानगरपालिकाया मेयर चिरिबाबु महर्जनं आर्थिक दँ २०८१÷८२ या वार्षिक नीति व कार्यक्रम न्ह्यब्वयादीगु दु । वय्कलं थीथी संघसंस्थालिसे सहकार्य यानाः सत्यमोहन जोशी एकेडेमी पलिस्था यायेगु खँ न्ह्यथनादीगु दु । अथे हे यलया सामुदायिक विद्यालययात स्मार्ट विद्यालयया रुपय् विकास यायेगु खँ नं न्ह्यथनादीगु दु ।

मेयर महर्जनं यलया लाय्कू लागायात ‘भेहिकल फ्रि जोन’ यायेगु, साइकल व पदयात्रायात प्रोत्साहन बीगु नं न्ह्यथंगु दुसा यल देय् यचुपिचु यायेत यलय् दुहां वइगु ततःग्वःगु गाडीतय्त यलया नाका लागाय् हे तयाः सिलेगु व्यवस्था यायेगु खँ नं धयादीगु दु ।

वि.सं. १९९० सालया भुखाय् लिपा पुनर्निर्माण मजूगुनिगु देगःत निर्माण यायेगु लिसें खोनाय् च्वंगु नेपालय् न्हापां बिजुली मत च्याकूगु छेँया संरक्षण यायेगु ग्वसाः नं न्ह्यःने हयादीगु दु ।
अथे हे त्वनेगु लःया नितिं मेलम्चीइ जक निर्भर मजुसे सिस्नेरी खुसिया लः यलय् हयेगु निंतिं योजना दयेकेगु खँ नं धयादीगु दु ।