न्हूसतकय् स्थानीययात दुःख बीगु शुरु

येँ (नेपालभाषा टाइम्स)- येँ महानगरपालिकाया २२ वडाय् लाःगु न्हूसतकय् पेटी चिब्या यायेगु थःगु ग्वसाःयात अनया वडा अध्यक्ष चिनिकाजी महर्जनं पंगः थंगु त्वहःचिनाः आः मनपां न्हूसतकय् लाःगु पसल्यातय्सं बाः पुलातःगु भ्वं जाँच याना हःगु दु । पसल्या व छेँथुवाःतय्सं अप्वः ध्यबाया कारोवार यानाः म्हो ध्यबा जक बाः पुलाच्वंगु आशंका यासें अनपां पसः पसलय् दुहां वनाः बाः पुलातःगु भ्वं स्वयेगु ज्या यानाच्वंगु खः ।

न्हूसतक लागाय् थौंकन्हय् पार्किङ चीकेसातकि ब्यापार म्हो जुयाः बाः पुलेत तकं थाकुयाच्वंगु इलय् मनपां बाः पुलातःगु भ्वं चेक याः वःगुलिं स्थानीय व्यवसायीत आतंकित जूगु दु । थ्व मनपाया मेयर बालेन साहं २२ वडाया अध्यक्ष चिनिकाजी महर्जनयात बदला कायेगु नियतं स्थानीयवासीत दुःख बीगु ज्या याना हःगु धकाः नं अनुमान यानाहःगु दु ।

न्हूसतकं वंघः वनेगु लँपुइ पेटी तब्या यायेगु थःपिनि कुतःयात सडक विभाग व २२ वडापाखें विफल यायेवं थौंकन्हय् उगु लागाय् नगर प्रहरी समेत पाः तयेगु बन्द याना बिउगु दु । नगर प्रहरी च्वनेगु बन्द जुइवं अन मोटरसाइकल, गाडी पार्किङ यायेगु नं शुरु जूगु दु । पार्किङ तःवःसां अन व्यवस्थापन याके मबिसे उगु लागायात अस्तव्यस्त जूगु क्यनेगु गलत नियत तयाः अन नगर प्रहरी पाः तयेगु कम याना हःगु अनुमान याःगु दु ।

थ्वहे झ्वलय् सतक विभागं अन सडक स्यंकाः जूवंगु आर्थिक क्षतिया लगत कयाः मनपायात पुइकेगु तयारी यानाच्वंगु खँ नं सीदुगु दु ।