पकनाज्वलय् ब्रेक फेल जुयाः माइक्रोबस दुर्घटना

येँ – थनया पकनाज्वः (सोह्रखुट्टे)लय् छगः माइक्रोबसया ब्रेक फेल जुयाः तःधंगु दुर्घटना जूगु दु । अमृत साइन्स कलेजं पकनाज्वः पाखां कुहां वयाच्वंगु इलय् बा १ ज ५८०० नम्बरया माइक्रोबसया ब्रेक फेल जूगु खः ।

ब्रेक फेल जुयाः अनियन्त्रित रुपं ब्वाँय् वःगु माइक्रों छगः मोटरसाइकलयात ठक्कर नकाः लुयायंकूगु व मेगु प्यंगःति मोटरसाइकलयात थियावंगु खँ प्रत्यक्षदर्शीतय्सं धाःगु दु । अनं नं खुसिबुँ अमृतसाइन्सपाखे थहां वयाच्वंगु बा ६ प ८३५६ नम्बरया प्राइम र्बैंकया कारयात ठक्कर नकूगु खः ।

कारयात ठक्कर नकेधुंकाः पाखा क्वय् छेँ ढलान यायेगु निंतिं सिमेन्ट वालेत हयातःगु मेसिनं ठक्कर नकेयंकूगु खः ।
माइक्रों लुयायंकूगु मोटरसाइकलया चालक व लिउने च्वनावःम्ह छम्ह मिसांम्ह बांमलाक घाःपाः जूगु खँ प्रत्यक्षदर्शीतय्सं धाःगु दु । उमित आः अस्पताल यंकूगु दुसा मोटरसाइकल प्रहरी चौकीइ यंकूगु खँ धाःगु दु ।

माइक्रोया चालक धाःसा बिसिउँ वंगु व माइक्रोय् च्वनावःपिं यात्रुत सामान्य घाःपाः जूगु दु । अथेहे कारय् च्वनावःपिं नं सामान्य घाःपाः जूगु खँ धाःगु दु ।