ने. सं. ११४४ कौलाथ्व पारू - नःलास्वनेगु

३० गते नेवाः–तामाङ सभा

येँ (नेपालभाषा टाइम्स)- थ्वहे वइगु मंसिर ३० गते नेवाः व तामाङ समुदाय जानाः असनय् मंकाः सभा याइगु जूगु दु । गणतन्त्र, संघीयता व धर्म निरपेक्षता पक्षया थ्व सभा यायेत्यंगु खः । उकिया तयारी कथं नेवाः देय् दबूपाखें म्हिगः थीथी नेवाः खलः पुचःलिसे खँल्हाबल्हा ब्याकूगु दु ।

नेवाः देय् दबूया संयोजनय् थीथी जातीय खलः पुचःया मंकाः ग्वसालय् मंसीर ३० गते शनिवाः न्हिनसिया १ बजे असनय् नेवाः–तामाङया मंकाः सभा जुइत्यंगु खः ।

मुँज्याय् नेवाः देय् दबूया नायः पवित्र वज्राचार्यं देशय् वःगु गणतन्त्र, संघीयता व धर्म निरपेक्षता विरुद्ध हानं थीथी गतिविधि याना हःगुलिं थ्व सभा यायेमाःगु खँ कनादिल ।
देय् दबूया न्वकु उमेश स्थापितं पहिचानसहितया संघीयताया आन्दोलनया निरन्तरता कथं उगु सभा जुइत्यंगु खँ कनादिसें आदिवासी जनजाति महासंघ नापं थीथी आदिवासी जातीय खलःतय्गु पुचलं देय्न्यंकं थुकथं सभा यायेगु निर्णय जूगु कथं येँय् नेवाः–तामाङ मंकाः सभा यायेत्यनागु खँ कनादिल ।

पहिचानविरोधी शक्तितय्सं गणतन्त्र व धर्म निरपेक्षताया विरोध यासें पिने जिल्लाय् जक मखु आः येँय् समेत थीथी ज्याझ्वः यानाः अराजक गतिविधि ब्वलंकाच्वंगुलिं उकियात खबरदारी याये कथं नं थ्व सभा यायेमाःगु खँ धाःगु दु ।

वकुन्हु येँया भूगोलपार्कय् मुनाः ¥याली यासें असनय् थ्यंकाः सभा याइगु ज्याझ्वः दु । ज्याझ्वलय् नेवाः व तामाङ आन्दोलनया न्ह्यलुवातय्सं सम्बोधन यानादीगु ग्वसाः दु ।