भृकुटीमण्डपया शैक्षिक मेलाय् मनपाया हस्तक्षेप

येँ (नेपालभाषा टाइम्स)- येँ महानगरपालिकां येँया भृकुटी मण्डपय् म्हिगःनिसें न्ह्याःगु शैक्षिक मेलाय् हस्तक्षेप यासें मेला पना बिउगु दु । येँ मनपाया शिक्षा विभागया अधिकारीसहित भृकुटी मण्डप वंगु नगर प्रहरीं अन तयातःगु स्टल चीकूगु खः । म्हिगः हे जक प्रतिनिधिसभाया सभामुख देवराज घिमिरें उगु मेलाया उलेज्या यानादीगु खः ।

प्रक्रिया पूमवंकुसें उच्च शिक्षालय लिसें माध्यामिक विद्यालय संघ (हिसानं) मेला सञ्चालन याःगु धासें येँ मनपां मेलाय् तयातःगु स्टलत चीकूगु खँ नगर प्रहरी प्रमुख राजु पाण्डें कनादिल ।

एसईई व १२ तगिंया लिच्वः पिहां मवयेकं स्टल तयाः विद्यार्थी व अभिभावकतय्त भर्नाया नितिं लोभ क्यंगु व भर्ना यायेत दबाब बीवं स्टल बन्द याकेमाःगु खँ नं वय्कलं धयादीगु दु । येँ मनपां लिच्वः पियाच्वंपिं विद्यार्थी व अभिभावकतय्त लक्षित यानाः ग्वसाः ग्वःगु मेला अनधिकृत रुपय् सञ्चालन जूगु खँ नं धाःगु दु ।

कान्तिपुर पब्लिकेसन व हिसानं मंकाः कथं ग्वसाः ग्वःगु मेलाय् ७५ स्वयां अप्वः शैक्षिक संस्थाया स्टल दु । स्वन्हु तक न्ह्याइगु उगु मेला थनिंनिसें हाकनं न्ह्याइगु खँ धाःगु दु । थनिंनिसें न्ह्याइगु मेलाय् विद्यार्थी भर्ना याये मदइगु व फीया बारे नं विद्यार्थीतय्त जानकारी बी मदइगु खँ येँ मनपाया मेयर बालेन साहया प्रेस सहजकर्ता सुरेन्द्र बजगाईं कनादीगु दु ।

वय्कःया कथं मेलाय् विद्यार्थीयात ब्वनेगु विषययात कयाः जक जानकारी बीगु शर्तय् पुनः मेला सञ्चालनया अनुमति बिउगु खः ।