महानगरया ज्याकू ल्ह्ययेगु शुरु

येँ(नेपालभाषा टाइम्स)÷येँ महानगरपालिकाया ज्याकू काठमाडौं प्लाजाय् तयेगु निंतिं सरसामानत ल्ह्येगु शुरु जूगु दु । थनया बागदरवारस्थित जेडीए कम्प्लेक्सय् च्वंगु महानगरया ज्याकू व थीथी कक्षत स्यंकाः काठमाडौं प्लाजाय् तये यंकेगु शुरु याःगु खः । कम्प्लेक्सया न्यागूगु तल्लाय् च्वंगु वित्त विभाग, आन्तरिक लेखा परीक्षण एकाइ, खुगूगु तल्लाय् दुगु प्रशासनय विभाग, प्रमुख प्रशासकीय अधिकृतया सचिवालय, अन्तर्राष्ट्रिय सम्बन्ध सचिवालयया ज्याकूलिसें कक्षत स्यंकाः कामठाडौं प्लाजाय् ल्ह्यःगु खः ।

वंगु छुं दिं न्ह्यःनिसें जेडीए कम्प्लेक्सय् च्वंगु ज्याकू व पार्टेसन यानातःगु कक्षत स्यंकेगु ज्या जुयाच्वंगु दु । येँ महानगर प्रशासन विभाग प्रमुखलिसें महानगरया सहायक प्रवक्ता दीपक अधिकारीं महानगरं बिया वयाच्वंगु सेवा रोके मजुइक ज्या यायेगु जुइ धासें थौं शनिवाः नं ज्याकू ल्ह्ययेत कर्मचारीतय्त सःतागु दु धयादिल ।

जेडीएय् च्वंगु कक्षया सामानत प्लाजाय् यंकेगु इलय् तज्याइगु, स्यनीगु वा छुं कथं नं क्षति मजुइमाः धइगु ल्याखं सावधानीपूर्वक यंकाः प्लाजाय् कक्ष निर्माण यानाः अन तयेगु व ज्याकू ल्ह्ययेबलय् फक्व म्हो खर्चं यायेगु जुइ धासें उकिया निंतिं येँ महानगरया नगर प्रहरी परिचालन यानागु नं वय्कलं जानकारी बियादीगु दु ।

थ्व स्वयां न्ह्यः येँ महानगरं बैशाख १ गतेनिसें हे काठमाडौं प्लाजापाखें सेवा प्रवाह यायेगु धाःसां नं छुं छुं प्राविधिक ज्या पूमवंगुलिं ज्याकू ल्ह्ययेगु हे लिपा लाः वंगु महानगरं जानकारी बिउगु दु । २०७२ सालय् विनाशकारी भुखाय् न्ह्यःतक येँ महानगरया दक्वं ज्याकुथिं(विभाग, महाशाखा) बागदरवारय् च्वंगु भवनपाखें सेवा बिया वयाच्वंगु खःसा भुखाचं भवन जीर्ण जुइवं महानगरया विभाग व महाशाखा थीथी थासय् बालं कयाः सेवा बिया वयाच्वंगु खः ।

नेपालभाषा टाइम्स

च्वमिया मेमेगु

• भाषासेवी विष्णु चित्रकार मंत, कन्हय् जगतसुन्दर ब्वनेकुथिइ अन्तिम श्रद्धाञ्जलीया निंतिं तइगु
• कुमारी छेँया त्वरं पुनर्स्थापना (भिडियाे रिपाेर्ट)
• बोस्टनय् सक्वया सम्पदाया चित्रकला ब्वज्या
• एनपीपीएया नायः पदय् शान्ति श्रेष्ठ
• समाजसेवी दिलबहादुर मानन्धर मंत