कोशीविरुद्ध विराटनगरय् जनसागर

येँ (नेपालभाषा टाइम्स)- कोशी प्रदेश नां यात कयाः विराटनगरय् अाइतवाः तःधंगु विरोध प्रदर्शन जूगु दु । प्रदर्शनय् द्वलंद्वः पहिचान पक्षधरत सतकय् कुहां वःगु खः ।

प्रदर्शनया झ्वलय् प्रहरी व प्रदर्शनकारी दथुइ थाय्थासय् ल्वापु नं जूगु दु । थ्वहे झ्वलय् प्रहरीं प्यम्हेसित ज्वंगु दु । ल्वापुयात झ्वलय् भीड नियन्त्रण यायेत प्रहरीं प्यंगू राउण्ड हवाई फायर यायेगुया लिसें छगू दर्जन स्वयां अप्वः टियर ग्यास कयेकूगु दु ।

प्रदर्शन पनेगु निंतिं मोरङ जिल्ला प्रशासनं शनिवाः हे कफ्र्यु घोषणा याःगु खःसां उकियात बेवास्ता यासें पहिचान पक्षधरतय्सं आइतवाः सुथंनिसें थाय्थाय् प्रदर्शन याःगु खः ।

पहिचान पक्षधरतय्सं प्रदेश १ या नां कोसी तःगु विरोध यासें थुगु प्रदेशया नां हाकनं नयेगु माग यासें संयुक्त संघर्ष समिति नीस्वनाः आन्दोलन याना वयाच्वंगु दु ।
थ्व हे झ्वलय् महेन्द्र चोकय् च्वंगु मुख्यमन्त्री व मन्त्रिपरिषद्या ज्याकु लिक्कसं लाःगु रोडशेषय् प्रदर्शनकारीत थ्यनेवं प्रहरी दथुइ झडप जूगु खः । निषेधित क्षेत्रय् प्रदर्शनकारीत कुहां वःगु धासें प्रहरीं टियर ग्यास कयेकाः हवाइ फायर याःगु खः ।

प्रहरीं मुख्यमन्त्री व मन्त्रिपरिषद्या ज्याकु लिक्कया थाय्यात निषेधित क्षेत्र घोषणा यानातःगु खः । प्रदर्शनयात ध्यानय् तयाः स्थानीय प्रशासनं थीथी थासय् सुरक्षा व्यवस्था कडा यानातःगु खः । प्रदर्शनकारीतय्सं मुख्यमन्त्री हिक्मतकुमार कार्कीया पुतला नं च्याकूगु खः ।