लुँचुभुलु अजिमा द्यःछेँया उलेज्या
येँ(नेपालभाषा टाइम्स)- येँ महानगर पालिका २७ वडा महाबौद्धस्थित लुँचुुभुलु अजिमा द्यःया द्यःछेँ पुनःनिर्माण क्वचाःगु दु । पुनःनिर्माण क्वचाःगु देगःया उलेज्या नं याःगु दु । येँ महानगरपालिकाया उपप्रमुख सुनिता डंगोलं वंगु शनिवाः जूगु छगू विशेष ज्याझ्वःया दथुइ पुनःनिर्माण सम्पन्न उग द्यःछेँया उलेज्या यानादीगु खः ।
वंगु शनिवाः जूगु ज्याझ्वलय् येँ महानगर उपप्रमुख डंगोलं पुनःर्निमित द्यःछेँय् तयातःगु ल्वहंपौ अनावरण यानाः उलेज्या यानादीगु खः । २०७३ सालनिसें पुनःनिर्माण शुरु जूगु द्यःछेँ मुक्कं छगू करोड ५७ गू लख तका लागतय् दयेकूगु खः । कुल लागतय् १७ गू लाख ५० द्वः येँ महानगरं ग्वाहालि याःगु खःसा मेगु जनस्तरं म्हःगु खः ।
द्यःछेँ उलेज्या लिपा नवासे उपप्रमुख डंगोलं अत्याधिक जनसहभागितापाखें आर्थिक संकलन यानाः पुनःनिर्माण याःगु द्यःछेँ सम्पदा संरक्षणया क्षेत्रय् समुदायया योगदानया निंतिं मेगु छगू नमूना ज्या जूगु खँ धयादीगु दु । वय्कलं थ्व द्यः छेँ दयेकेत मेमेगु निकाय स्वयां नं समुदायया थःगु हे ग्वाहालि व योगदान आपालं दु धयादिल । ‘थुकथंया ज्यां सम्पदाप्रति अपनत्व महसुस जुयाः थ्व जिगु नं सम्पदा खः धइगु भावना ब्वंकेत ग्वाहालि याइ’ वय्कलं धयादिल ।
समुदाय थः हे न्ह्यचिलाः व जागृत जुयाः न्ह्याः वनेगु खत धाःसा येँ महानगरपालिकां न्ह्याबलें नं ग्वाहालि यानाच्वनी धइगु खँय् प्रतिवद्धता प्वंकादिसे आवश्यक ग्वाहालिया निंतिं येँ महानगरया लुखा न्ह्याबलें नं चाली धयादिल ।
लुँचुभुलु अजिमा महाबूया अध्यक्ष पंचनारायण महर्जनं द्यःछेँ निर्माणया ज्याय् स्थानीय समुदायया तःधंगु योगदान दुगु चर्चा यानादिसें द्यःछेँ निर्माणया इलय् सम्बन्धित गुथिया दुजःपिंसं श्रमदान यायेगु व श्रद्धालु भक्तजनपिंसं आर्थिक ग्वाहालि याःगु जानकारी बियादिल ।
द्यःछेँ निर्माणया इलय् गुथिपाखें नियमित रुपं यायेमाःगु भ्वय् खर्च तकं क्वपालाः पुनःनिर्माणय् लगानी यानागु जानकारी नं वय्कलं बियादिल ।
येँ महानगर २५ वडा केलत्वालय् विराजमान लुँचुभुलु अजिमायात लुँमधि अजिमाकथं नं कायेगु यानातःगु दुसा पुनःनिर्मित द्यःछेँय् जात्रासम्बन्धी हलंज्वलं तयेगु व न्हू पुस्तायात बाजं स्यनेगु याना वयाच्वंगु दु ।
LEAVE YOUR COMMENTS