प्रज्ञा भवनया दबुलिइ दाफा संगीत

येँ(नेपालभाषा टाइम्स)- प्रज्ञा भवनया दबुलिइ स्वनिगःया प्राचीन दाफा संगीतलिसें दाफा प्याखंया परम्परा विषयय् छगू ज्याझ्वः जुल । मैथिली भाय्या नांजाःम्ह साहित्यकारलिसें प्राज्ञ धिरेन्द्र पे्रमर्षिया विशेष कुतलय् वंगु शुक्रवाः प्रज्ञा भवनया दबुलिइ उगु ज्याझ्वः जूगु खः । नेपाल संगीत तथा नाट्य प्रज्ञा प्रतिष्ठान अन्तर्गतया परम्परागत तथा शास्त्रीय संगीत विभागया ग्वसालय् जूगु प्राचीन दाफा संगीत नृत्य ज्याझ्वलय् स्वनिगःया थीथी दाफा खलःपाखें मौलिक दाफा बाजंलिसें नृत्य न्ह्यब्वःगु खः ।

प्राज्ञ पे्रमर्षिया सभापतित्वय् न्ह्याःगु ज्याझ्वःया उलेज्या मूपाहांकथं झायादीम्ह असं दाफा नायः प्रज्ञारत्न तुलधरं यानादीगु खः । किपू नगरपालिकाया पुलांम्ह नगर प्रमुख रमेश महर्जन विशेष पाहाकथं झायादीगु ज्याझ्वलय् संचारकःमिलिसें नेवाः देय् दबू स्वनिगः विशेष प्रदेशया नायः श्रीकृष्ण महर्जनं दाफा बाजं सम्बन्धी ज्यापौ न्ह्यब्वयादीगु खः । उगु ज्यापौयात कयाः संस्कृतिविद् गणेशराम लाछिं टिप्पणी यानादीगु खः ।

ज्याझ्वलय् नवासें प्राज्ञ महर्षिं दाफा भजन धइगु जीवनया पद्दति जूगु धासें थुकिं जीवनया थीथी आयामयात नं न्ह्यबवयाच्वंगु दइ धयादिल । नेवाः व मैथिली सभ्यता दथुइ आपालं समानाता दुगु खँ न्ह्यथँसें वय्कलं दाफा भजनं झीत थुकथंया सांस्कृतिक सम्पदा बियातःगु दु धइगु थुइकेमाः धयादिल ।

ज्याझ्वलय् यल नःत्वाः मंकाः खलः, मध्यपुर थिमिया गुंगः चीभाः दाफा खलः, किपूया दाफा भजन खलःपाखें दाफा भजनया न्ह्यब्वःगु खःसा धापासीया बासुरि पुचःया मिसापिंसं बासुरि न्ह्यब्वःगु खः । उगु हे ज्याझ्वलय् धापासीपाखें मिसाम्हं लसिं प्याखंलिसें न्या लायेगु प्याखं नं न्ह्यब्वःगु खः ।

ज्याझ्वलय् ब्वति कयादीपिं दाफा भजन खलयात मूपाहां व विशेष पाहांपाखें दसिपौ नं लःल्हाःगु खः ।