अराजक सुकुम्बासीतय्त कारवाहीया तयारी

येँ (नेपालभाषा टाइम्स)- येँ महा महानगरपालिकाया मेयर बालेन साहया विरुद्ध अपमानजनक खँग्वः छ्यलाः नारा लगे याःगु खँयात कयाः मधेशी आयोगं कारवाही न्ह्याकीगु जूगु दु । थापाथलीया सुकुम्बासी वस्ती चीकेत कुतः यात धकाः अन च्वंपिं सुकुम्बासीतय्सं मेयर साहयात ‘धोती’, ‘मधिसे’ खँग्वः छ्यलाः ब्वः बिउगु खः ।

उकिया भिडियो नं सार्वजनिक जूगु दुसा आयोगं उकिया हे लिधंसाय् कारवाही न्ह्याकेत्यंगु खः । आयोगय् उगु भिडियो सहित उजुरी लाःगु खः । आः आयोगं भिडियोलय खने दुपिं मनूत मात्तुमालाः कारवाही याइ धाःगु दु ।

अथे हे मेखे थापाथलीइ सुकुम्बासीया आक्रमणय् लानाः घाःपाः जूपिं मनपाया नगर प्रहरीतय्सं आक्रमण याःपिं झिंच्याम्हेसिया विरुद्ध किटानी जाहेरी बीत्यंगु दु । येँ महानगर प्रहरीया प्रहरी उपरीक्षक दिनेश अर्यालया कथं महानगरीय प्रहरी परिसर टेकुइ घाःपाः जूपिं नगर प्रहरीं किटानी जाहेरी दर्ता यायेत्यंगु दु ।

वंगु सोमवाः महानगर प्रहरीं थापाथलीया च्वंगु बागमति खुसि सिथय् अव्यवस्थित बस्ती चीकेगु कुतः याःबलय् वस्तीइ च्वंपिंसं घरेलु ल्वाभः सहित नगर प्रहरीयात आक्रमण याःगु खः । उकी लानाः ३१ मह नगर प्रहरी घाःपाः जूगु खः । थ्व स्वयां न्ह्यः महानगरपालिकां नगर प्रहरी विरुद्ध आक्रमण जूगु धासें जिल्ला प्रशासन कार्यालय व प्रहरीइ पौ छ्वःगु खः । बुधवाः जिल्ला प्रशासन कार्यालय येँनं पौ कथं कारबाही न्ह्याकेत प्रहरीयात निर्देशन बिउगु दु ।

सम्बन्धित बुखँ

LEAVE YOUR COMMENTS