युवक बौद्ध स्कुलया वार्षिकोत्सव

यल- युवक बौद्ध मण्डल, नेपालपाखें संचालन जुयाच्वंगु युवक बौद्ध मण्डल स्कुलया झिंस्वक्वःगु वार्षिकोत्सव वंगु शनिवाः जुल । स्कुल संचालक समितिया अध्यक्ष पुष्परत्न वाराहीया सभपातित्वय् जूगु ज्याझ्वलय् यल महानगरपालिका १९ वडाअध्यक्ष विनोद ताम्राकार मूपाहांकथं झायादीगु खः ।

पंचशील प्रार्थनालिसें न्ह्याःगु ज्याझ्वःया मूपाहां वडाअध्यक्ष ताम्राकारं बुद्धमूर्ति न्ह्यःने दीप प्रज्वलन यानाः उलेज्या यानादीगु खः । स्कुलया प्रिन्सिपल चन्द्रमान शाक्यं लसकुस यायेगु झ्वलय् स्कुलया गतिविधि बारे नं जानकारी बियादीगु ज्याझ्वलय् युवक बौद्ध मण्डललिसें स्कुल संचालक समितिया पुलांम्ह अध्यक्ष सानुराजा शाक्य, वर्तमान अध्यक्ष अरणीतारा वज्राचार्यं भिंतुना न्वचु बियादीगु खः ।
मूपाहां ताम्राकारं स्कुलया निंतिं वडापाखें फक्व ग्वाहालि यायेगु प्रतिवद्धता प्वंकादीगु ज्याझ्लवय् सभापतिपाखें सुभाय् देछासे न्हापांगु चरणया ज्याझ्वः क्वचायेकादीगु खः ।

निगूगु चरणय् श्रद्धेय भिक्षु संघपाखें परित्राण पाठ याना बिज्याःगु खःसा भिक्षु विमलों ओवाद बियाबिज्याःगु खः । स्कुलया वार्षिकोत्सवया लसताय् भिक्षु संघ व अनागारिका गुरुमांपिंत भोजन दान नं याःगु खः ।

२०६५ चैत २२ गतेया दिंकुन्हु युवक बौद्ध मण्डलया तत्कालीन अध्यक्ष सानुराजा शाक्यया अध्यक्षताय् स्थापना जूगु स्कुलया उलेज्या विश्व बौद्ध भातृत्व युवा संघया तत्कालीन अध्यक्ष अनुरुत भग्वानिज (थाइल्याण्ड)पाखें जूगु खः ।

सम्बन्धित बुखँ

LEAVE YOUR COMMENTS