एमसीसी पास यायेगु डिजाइन

राजनीतिइ स्थायी शत्रु नं दइमखु स्थायी मित्र नं दइमखु धाइ । राजनीतिइ क्यनेगु छता यायेगु मेता जुइ । अथे हे राजनीतिइ फःसा कन्भिन्स याइ, मफुसा कन्फ्युज याइ । थ्व राजनीति याइपिंसं म्हितीगु चाल खः । नेता कार्यकर्तातय्गु नियत खः ।

थौं नेपाःया राजनीतिइ पार्टीया नेतातय्सं थुगु हे कथंया खेल म्हिताच्वंगु दु । दलया शीर्ष नेतातय्सं गबले छु निर्णय याइ धकाः धाये तकं फयाच्वंगु मदु । सर्वसाधारण जनतानिसें क्वय्या तहलय् च्वंपिं कार्यकर्तात तकं अन्यौलय् दु । कन्फ्यूजय् दु । उमिसं नेतातय्सं छु यानाच्वन धकाः धाये फयाच्वंगु मदु । नेतातय्सं थौं छु याइ ? कन्हय् छु याइ ? धकाः धाये फयाच्वंगु अवस्था मदु ।

सत्ता गठबन्धनय् दुथ्याःगु नेपाली कांग्रेस, माओवादी केन्द्र व एकीकृत समाजवादी पार्टीया शीर्ष नेतातय्सं गोप्य योजना दयेकाः प्रधानन्यायाधीश चोलेन्द्र शम्शेर जबरा विरुद्ध महाअभियोग आकाझाकां दर्ता याःगु दु । सत्ता गठबन्धनय् हे दुथ्याःगु जनता समाजवादी पार्टी व राष्ट्रिय जनमोर्चाया शीर्ष नेतातय्सं महाभियोग दर्ता जुइधुंकाः तकं मसिउ । उलि जक मखु महाभियोग दर्ता याःगु दलया सांसदत गुपिंसं ल्हाःचिं तल उमिसं तकं दर्ता मजूतले मसिउ । थुकिया अर्थ तसकं शीर्ष नेतातय्सं तसकं गोप्य कथं तयारी यानाः महाभियोग दर्ता याःगु दु ।

सत्तापक्षं आकाझाकां महाभियोग दर्ता यायेवं उकिया ‘प्रतिरोध’ यायेगु धकाः सार्वजनिक रुपं प्रमुख प्रतिपक्ष दल एमालेया नेताय्सं न्वंवाना हयेधुंकूगु खः । तर संसदीय दलया बैठक लिपा एमालें चोलेन्द्र शम्शेर जबरायात कुबिया जुइ फइमखु धकाः न्ववानाहल । अथेहे थुकी निर्णय यायेगु भाला शीर्ष नेतातय्त बिइगु ज्या यात । थुकिया अर्थ एमाले आः ‘तत्काल काउन्टर महाअभियोग’ तयेगु पक्षय् मंत धकाः थुइकेफु ।

चोलेन्द्र शम्शेर जबरासहित न्याम्ह न्यायधीशपाखें संसद विघटनयात अस्वीकार यानाः पुनःस्थापित याःगु खः । अबले जबराया मत पुनःस्थापना मयायेगु पक्षय् खःसां मेपिं प्यम्ह न्यायधीशपिं पुनस्थापना यायेगु पक्षय् दुगुलिं संसद पुनस्र्थापना जुल । उकिं एमालें मेपिं प्यम्ह न्यायाधीशपिंत नं महाभियोग तयेगु धम्की बिउगु खः । तर मेपिं न्यायाधिशतय्त महाभियोग तल धाःसा उकियात जनतां बांलाःगु मिखां स्वइमखु धयागु आः तायेकूगु खनेदु ।

प्रधानन्यायाधीशयात महाअभियोग तःगु विषययात कयाः स्वयेबलय् सत्तापक्ष व प्रतिपक्षी दथुइ तसकं द्वन्द्व खनेदुसां दुनें दुनें धाःसा थ्व घटनायात तःधंकथं नाला कयाच्वंगु खनेमदु । एमालेया समर्थन विना महाभियोग पारित जुइमखु । दुई तिहाई बहुमत दयेकेत एमालेया छुं छुं सांसद जूसां नं महाभियोगया समर्थनय् वने हे माः । उकिं एमालें महाभियोगयात सत्तापक्षं ल्ह्वंगु छगू पलाःया रुपय् जक काःगु दु । थ्व घटनायात कयाः स्वल धाःसा नेपाःया राजनीतिक दलया नेतातय्सं गुलि नं खेल म्हिताच्वंगु दु थ्व फुक्क दुने छता पिने मेता कथं म्हिताच्वंगु स्पष्ट जूगु दु ।

छखे स्थानीय तहया चुनाव दु, मेखे अमेरिकी सहयोग एमसीसी मूल विषय जुयाच्वंगु दु । थ्व दथुइ महाभियोग नं प्रमुख विषय जुया वःगु दु । कानुन व्यवसायीत थनिं सच्छिन्हु न्ह्यवंनिसें हे प्रधानन्यायाधीश जबरा विरुद्ध आन्दोलनय् कुहां वयाच्वंगु खः । अले न्यायालययात भिंकेमाल धकाः प्यखेरं सः थ्वयाच्वंगु दु । थ्व हे इलय् सत्तापक्षं महाभियोग तःगु धयागु न्यायालयया सवालय् ब्वलनाच्वंगु गुगु कथंया जनमत खः उकियात थःपिनिगु पक्षय् हयेगु नापं एमालेयात छुं हद तक ज्यामछिंकेगु नितिं जक ल्ह्वंगु पलाः खः । प्रधानन्यायाधीश एमाले पक्षयाम्ह जूगुलिं वय्कःयात महाभियोग तयेगु धयागु संसद पुनस्थापनाया सवालयात कया एमालें ‘जनादेशया विरुद्ध परमादेश’ धकाः लाये बुयाच्वंगुयात हुइगु निंतिं याःगु कुतः जक खः धायेफु । अथे हे स्थानीय तहया चुनाव जुइगु इलय् जनताया मत सालेगु निंतिं ल्ह्वंगु पलाः जक खः धायेफइगु अवस्था दु ।
महाभियोगया प्रस्तावनिसें स्थानीय तहया चुनाव नापं संसद संचालनया सवाल तकं अन्ततः एमसीसीलिसे हे स्वानाच्वंगु दु । एमसीसी पास यायेगु पक्षय् थःपिं वन धाःसा कन्हय् जनतां साथ मबिइ धकाः माओवादी केन्द्र, एकीकृत समाजवादी नापं एमाले ग्यानाच्वंगु दु । कांग्रेस धाःसा एमसीसी पास यायेगु पक्षय् हे वनाच्वंगु दु । आः नेपाःया राजनीतिइ छखे संसद संचालन यायेमाःगु मेखे एमसीसी पारित यायेमाःगु अले स्थानीय चुनाव नं यायेमाःगु अवस्था दु । उकिया निंतिं थीथी कथंया दाउ ज्वनेगु झ्वलय् महाअभियोग तयेगु ज्या जूगु खनेदु । थनं लिपा नं अज्याःगु हे कथंया घटना आकाझाकां मजुइ धकाः धाये थाकु । न्ह्यागु हे घटना जूसां नं अन्तत एमसीसी पारित यायेगु डिजाइन कथं हे प्रमुख दलया प्रमुख नेतातय्सं भूमिका म्हिताच्वंगु खनेदु ।

फागुन १६ गते तकया दुने पारित यायेमाःगु, एमसीसीया छुं नं बुँदा हिलीमखु धकाः गुगु कथं नेपाःया राजनीतिक दलया नेतातय्त धायेगु यात थुकिं हे सीदु कि नेपाःया नेतात गुगु नं इलय् अमेरिकाया न्ह्यःने लम्पसार जुइफु धकाः । एमसीसी पारित मयात धाःसा चीनया कारणं खः धकाः थुइकेमाली धकाः छगू कथंया ख्याच्वः बिइगु ज्या अमेरिकां याःगुलिं नं स्पष्ट जू कि एमसीसी सम्झौता अन्तत सुप्रति लक्षित अले नेपाःया नितिं गुलि पाय्छि जू धकाः यक्वसिनं अनुमान याये धुंकूगु दु ।

आः एमसीसी पारित यायेगु निंतिं लां लां न्ह्यःनिसें अबरुद्ध जुयाच्वंगु संसदयात चायेकेगु मेगु खेल नं जुइ । उगु इलय् कांग्रेस मूल रुपं एमसीसी पारित यायेगु निंतिं न्ह्याः वइगु अवस्था जुइ । एमाले प्रमुख प्रतिपक्ष दलया ल्याखं संसदय् उपस्थिति मजुइगु बाय् बहिस्कारया पक्षय् वनी । अले माओवादी केन्द्र व एकीकृत समाजवादी नं बहिस्कारया पक्षय् वनी । उगु इलय् संसदय् उपस्थित जुयादीपिं सांसदया ल्याखं कांग्रेसं पारित यानां त्वःती । अले एमसीसी पारित याःम्ह कांग्रेस जुइ, एमाले, माओवादी केन्द्रनिसें एकीकृत समाजवादी पार्टीं न्ह्यागु कथंया ब्याख्या याना जूसां जनताया दथुइ वनेत लँ चाली । थुगु कथंया घटना यायेगु निंतिं हे प्रमुख दलया प्रमुख नेतातय्सं थःथःगु कथंया दाउ कयाः भूमिका म्हिताच्वंगु दु ।

आः गुगुं नं इलय् एमसीसी पारित जुल धकाः समाचार वल धाःसां आश्चर्य जुइमाःगु अवस्था मदु । अले जनतां नं उकियात गुगु कथं काइ धकाः स्पष्ट जूगु मदुनि । बरु एमसीसी पारित याये धुंकाः उकिं छु गज्याःगु लिच्वः नेपाः व नेपाःमि जनतायात लाइ धकाः स्वयेगु धाःसा ल्यंदनि ।

सम्बन्धित बुखँ

LEAVE YOUR COMMENTS