सिघलय् हारती अजिमाया देगः या जग स्वन

येँ – सिघःबहाया नामं नांजाःगु श्रीशान्तिघट बज्रधातु चैत्य महाविहारय् च्वंगु हारती अजिमा द्यःया देगःया पुनर्निमाणया निंतिं जग स्वनेगुज्या जूगु दु । येँ महानगरपालिकाया मेयर विद्यासुन्दर शाक्यं वंगु मंगलवाः जग स्वनादीगु खः । देगः पुनर्निमाणया निंतिं माःगुु सकतां पुजा विधिया ज्या गुरु यज्ञमानपति बज्राचार्यया नेतृत्वय् गुरुजु दिनेश बज्राचार्य लगायतं पुजा याःगु खँ श्रीशान्तिघट बज्रधातु चैत्य महाविहार संरक्षण समितिया नायः शुभकाजी शाक्यं कनादीगु दु ।

जगस्वने ज्याय् महाविहारया थायपा आजु, सकारात्मक सोचया न्ह्यलुवाः नांजाःम्ह पर्यटन व्यवसायी कर्ण शाक्यया नं उपस्थिति दुगु खः । देगः पुननिर्माणया निंतिं येँमहानगरपालिकापाखें आर्थिक खर्च याइगु खँ दुसाः थुकी महाविहार संरक्षण समितिया उपभोक्तापाखें ५ प्रतिशत दां खर्चभारया भाला क्वबिइगु खँ क्वःछिनातःगु दु ।

जगस्वने ज्या यानादिसें येँ मनपाया मेयर शाक्यं इतिहासयात म्वाका तयेया निंतिं प्राचीन स्मारकया मर्मत, सम्भार, जीर्णोद्धार व पुननिर्माणया ज्या येँ महानगरपालिकाया नीतिगत प्रबन्ध, बजेट व कार्यक्रमपाखें जुयाच्वंगु खँ कनादिल । हारती अजिमाया देगः पुननिर्माणया खँय् मेयर शाक्यं थुगु देगःया सिं पुलाँ जुया दुनेदुनें ध्वगिना वये धुंकूगु व पःखाः नं छ्वासुयावःगुलिं परम्परागत निर्माण सामग्री छ्यलाः पूर्ववत स्वरुप व शैलीइ तयार जुइकथं उपभोक्ता समिति, गुठीयार व द्यःपाःलाः शाक्यसंघलिसे सहलह याना पुननिर्माणया ज्या जूगु खँ कनादिल ।

उपभोक्ता समितिया पुरन शाक्यया धापु कथं श्रीघःया हारति अजिमाया देगः करीब स्वसःदँ पुलांगु खःसा थ्व देगःया पुननिर्माण करीव १ सय ५६ दँ न्ह्यः नं जूगु खँ अभिलेखय् च्वयातःगु दु । वि सं १९९० सालय् तःभुखाय् ब्वःबलय् नं छुं मजूगु देगः २०७२ बैशाख १२ या भुखाचं धाःसा दुनेदुनें स्यनावंगु खँ नं वय्कलं कनादिल । जगस्वने ज्याय् वडा २५ या अध्यक्ष एवं विपद व्यवस्थापन समितिया संयोजक नीलकाजी शाक्य, कार्यपालिका सदस्य रमिताकमल स्थापित सहित जनप्रतिनिधि व संरक्षण समितिया पदाधिकारीपिनिगु सहभागीता दुगु खः ।

सम्बन्धित बुखँ

LEAVE YOUR COMMENTS