बुद्ध बूगु देशय् बूपिं धकाः गर्व यायेमाः

येँ – येँ महानगरपालिकाया प्रमुख विद्यासुन्दर शाक्यं नेपाःमिपिंसं थः बुद्ध बूगु देशय् बूपिं धकाः गर्व यायेफयेकेमाःगु खँ धयादीगु दु । येँ मनपा १५ वडा, किम्डोलय् च्वंगु किमडोल बहालय् शाक्यधिता नेपालया ध्यान भवनया शिलान्यास यानादिसें वय्कलं थ्व खँ धयादीगु खः ।

‘बुद्ध धर्मया मर्मयात प्रवद्र्धन व प्रचारप्रसार यायेत येँ महानगरपालिकां थेरवादी व वज्रयानी विहारया निर्माण, पुनर्निर्माण लिसें शैक्षिक ज्याझ्वः न्ह्याकेत ग्वाहालि याना वयाच्वंगु दु । बुद्धया दर्शनयात प्रवद्र्धन यायेत थ्व सरकारयापाखें याःगु लगानी खः’ धासें वय्कलं धयादिल, ‘बुद्ध दर्शनया निंतिं विश्वया यक्व देशं लगानी यानाच्वंगु दु । थ्व इलय् नेपालं नं लगानी यायेमाः धकाः न्ह्याः वनाच्वनागु दु ।’

थ्व बहा दुने ३५०० वर्गफिट लागाय् स्वतँ व बातँ दुगु भवन दयेकेत्यंगु दु । थुकिया निंतिं येँ महानगरपालिकां ७६ लाख दां अनुदान उपलब्ध याःगु खः । थुकी उपभोक्तापाखें ५ प्रतिशत दां तइगु जुइ ।

ज्याझ्वलय् शाक्यधिताया पदाधिकारीपिंसं महानगरपालिकापाखें याःगु ग्वाहालिया निंतिं सुभाय् देछासें महानगरं सरकार दुगु अनुभुति याकाच्वंगु धाःगु खः । बहाल च्वना बिज्यानाच्वंपिं इन्द्रवाती गुरुमां व मेत्तावती गुरुमामं बुद्ध दर्शनया प्रवद्र्धन म्हो जुयाच्वंगु इलय् थ्व बहालय् प्रवद्र्धनया योजना दयेकाः प्रचार प्रसार यायेगु ज्या जुइगु खँ कनाबिज्याःगु खः ।