संविधान संशोधन यायेत संघर्ष

येँ – नेकपा माओवादी केन्द्रका अध्यक्ष पुष्पकमल दाहालं संविधान संशोधनया नितिं सतक, सदन व सरकार लगायत फुक्क हे क्षेत्रं संघर्ष यायेगु खँ धयादीगु दु । येँय् न्ह्यानाच्वंगु पार्टीया च्याक्वःगु तःमुँज्याया बन्द सत्रय् राजनीतिक प्रतिवेदन न्ह्यब्वसें अध्यक्ष दाहालं संविधान संशोधनया नितिं संघर्ष यायेगु प्रस्ताव यानादीगु खः ।

वय्कलं संविधानपाखें उत्पीडित वर्ग, जाति, क्षेत्र व समुदायया म्हसीका लिसें अधिकार सहितया संघीयता संस्थागत यायेमफुगु खँ धासें धयादिल, ‘थ्व संविधानय् झीगु सीमा दु, निर्वाचन प्रणाली, शासकीय स्वरुप उत्पीडित वर्ग, जाति क्षेत्र व समुदायया म्हसीका व अधिकार सहितया संघीयता संस्थागत याये धाःसा फयाच्वंगु मदु, अथे जुयाः जिमिगु पार्टीं थ्व घनिभूत विषयय् संविधान संशोधनया आवश्यकता खने दुगु दु ।’

म्हिगःया बन्द सत्रय् अध्यक्ष दाहालं ‘२१ औं शताब्दीमा समाजवादको नेपाली बाटो’ शीर्षकया राजनीतिक दस्तावेज न्ह्यब्वयादीगु खः । प्रतिवेदनय् समान विचार तइपिं वामपन्थी व लोकतन्त्रवादी शक्ति दथुइ मंकाः मोर्चा दयेकेगु कार्यदिशा नालेगु खँ न्ह्यथनातःगु दु । उकथं हे वर्तमान संविधान थीथी आन्दोलनं प्राप्त उपलब्धी ल्यंकेत पार्टीं विशेष भूमिका म्हितेगु खँ नं न्ह्यथनातःगु दु ।

उकथं हे दाहालं न्ह्यब्वःगु राजनीतिक प्रतिवेदनय् यथास्थितिइ एमसीसी सम्झौता पारित याये मजिउगु खँ नं न्ह्यथनातःगु दु । दाहालं परियोजना परिमार्जन व संशोधन लिपा जक पारित यायेगु नीति नालेगु खँ न्ह्यथनातःगु दु । प्रतिवेदनय् धयातःगु दु, ‘एमसीसी परियोजना परिमार्जन व संशोधन लिपा जक पारित यायेगु नीति कयागु दु, यथास्थितिइ गुगुं नं हालतय् पारित यायेगु जुइ मखु ।’

म्हिगः पार्टी अध्यक्ष दाहालं न्ह्यब्वःगु राजनीतिक प्रतिवेदनयात कयाः सहलह यायेगु नितिं थीथी नीन्यागू पुचः गठन याःगु दु ।
उगु प्रतिवेदनय् सहलह यायेगु नितिं माओवादीपाखें प्रज्ञा भवन लगायत येँया थीथी पार्टी प्यालेसय् व्यवस्था यानातःगु दु ।

१५ सदस्यीय पदाधिकारी
नेकपा (माओवादी केन्द्र) या केन्द्रीय समिति १९९ सदस्यीय दयेकीगु जूगु दुसा पदाधिकारीतय् ल्याः १५ म्ह दइगु जूगु दु । पार्टी स्थायी समितिया दुजः देव गुरुङं न्ह्यब्वयादीगु विधान मस्यौदाय् थ्व खँ न्ह्यथनातःगु दु । आः माओवादीइ नं एमालेय् थें हे छम्ह अध्यक्ष, छम्ह वरिष्ठ उपाध्यक्ष, खुम्ह उपाध्यक्ष, छम्ह महासचिव, निम्ह उपमहासचिव, स्वम्ह सचिव व छम्ह कोषाध्यक्ष दइ । थ्व स्वयां न्ह्यः पार्टीइ न्याम्ह दुजःतय् हेडक्वार्टर प्रमुख अंग जुयाच्वंगु खः ।

सम्बन्धित बुखँ

LEAVE YOUR COMMENTS