प्रहरी पाः तयाः फोहोर यंकल

येँ (नेपालभाषा टाइम्स)- वंगु साउन १ गते निसें धादिङया बञ्चरेडाँडाय् यंके मफयाच्वंगु फोहोर म्हिगः नेपाल प्रहरीया ग्वाहालिइ फोहोर वायेगु ज्या जूगु दु । म्हिगः प्रहरीं स्कर्टिङ यानाः फोहोर वायेगु ज्या जूगु खः । प्रहरीया स्कर्टिङय् फोहोर ज्वना वंगु गाडीयात स्थानीय वासिन्दां पंगः थनेत स्वःगु इलय् स्थानीय वासिन्दा व प्रहरीया दथुइ झडप जूगु दु ।

येँ महानगरपालिका १७ या वडाध्यक्ष लिसे मनपाया प्रवक्ता नविन मानन्धरं म्हिगः सछिगः स्वयां अप्वः गाडीं फोहोर यंकेगु ज्या जूगु खँ कनादीगु दु । वय्कःया कथं थौंया दुने येँय् मुनाच्वंगु दक्व फोहोर वायेगु ज्या क्वचाइगु खँ धयादीगु दु । येँय् थौंकन्हय् ५० निसें ६० टिप फोहोर मुनाच्वंगु खँ कनादिसें वय्कलं न्हिछिया दुने वायेगु ज्या क्वचाइगु धयादीगु दु । थ्वहे झ्वलय् येँया थीथी सतकय् वानातःगु फोहोर द्वँचिनाच्वंगु खनेदु ।

फोहोर वायेगु नितिं वंगु बुधवाः सहरी विकास मन्त्रालयय् प्रभावित क्षेत्रया स्थानीय बासिन्दा लिसे सहलह जूगु खःसां नं ठोस निष्कर्ष धाःसा पिहां मवःगु खः । थ्वहे झ्वलय् म्हीग जक फोहोर जायाच्वंगु बञ्चरेडाँडाय् फोहोर त्वपुइत चा सहित गाडी वंगु खः । फोहोरं यानाः भुजिं अप्वयेवं फोहोर ल्हाकेत चा दुगु गाडी छ्वःगु खः ।

स्थानीय वासिन्दां फोहोर लिसे मनूत च्वने मफइगु खँ धासें फोहोर वायेगु थाय् जःखः १ किलोमिटर तकया जग्गा अधिग्रहण यायेमाःगु माग याना वयाच्वंगु दु । थ्व स्वयां न्ह्यः स्थानीय वासिन्दा व सरकारया दथुइ जूगु वार्ताया झ्वलय् थःपिनिगु माग तयागु खःसां नं उगु माग सम्बोधन मजू धासें स्थानीय वासिन्दा आन्दोलनय् कुहां वःगु खः ।

कन्हय् स्वनिगःया नगर फोरम लिसे धुनिबेसी नगरपालिका व ककनी गाउँपालिकाया प्रमुख सहितया बैठक च्वनाः दीर्घकालीन रुपं समस्या ज्यंकेगु नितिं सहलह यायेगु तयारी जुयाच्वंगु खँ सहरी विकास मन्त्रालयं जानकारी बिउगु दु ।