विश्वकप छनोटया न्हापांगु कासाय् नेपाः बुत

येँ – आइसिसी महिला टी–२० विश्वकप एसिया छनोट अन्तर्गत जूगु थःगु न्हापांगु कासाय् नेपाः बूगु दु । सोमवाः दुबइलय् जूगु कासाय् नेपाःयात हङकङं खुगू विकेटं बुकूगु खः ।

कासाय् टस बुनाः न्हापां ब्याटिङ याःगु नेपालं निर्धारित २० ओभरय् स्वंगू विकेटया क्षतिइ मुक्कं १०४ रन दयेकूगु खः । नेपाःया सीता रानामगरं ५८ बलय् सर्वाधिक ४० रन दयेकूगु खः । रानामगरं प्यंगू चौका थ्वाःगु खः । अथेहे इन्दु वर्मां नेपाःया निंतिं अविजित ३१ रन दयेकूगु खः । वर्मां स्वंगू चौका थ्वाःगु खः । नेपाःया ओपनर कविता कुँवर शन्यु आउट जुलसा काजल श्रेष्ठ प्यगू रन व कप्तान रुबिना क्षेत्रीं निगू रन जक दयेकूगु खः । हङकङया बेट्टी चान व क्यारी चानं छगू छगू विकेट काःगु खः ।

नेपालं बिउगु १०५ रनया सामान्य लक्ष्य हङकङं १८ ओभरय् प्यंगू विकेटया क्षतिइ पूवंकूगु खः । हङकङया मारिको हिलं ४२ रन, क्यारी चेनं १७ रन दयेकूगु खः । नेपाःया कविता कुँवर, सीता रानामगर व सबनम राईं छगू छगू विकेट काःगु खः ।

आइसिसी महिला टी–२० विश्वकप एसिया छनोट अन्तर्गत दुबइलय् जुयाच्वंगु कासाया शीर्ष छगू टिम जक विश्वकपय् छनोट जुइ । न्हापांगु कासाय् बूगुलिं आ नेपाःयात छनोटया मेगु प्यंगुलिं कासा त्याकेमाःगु दबाब दुसा हङकङ नं पराजित जुइमानि ।

नेपालं निगूगु कासा मंसिर ७ गते मंगलवाः भुटानलिसे, ९ गते बिहिवाः कुवेतलिसे, १० गते शुक्रवाः मलेसियालिसे व १२ गते आइतवाः युएइलिसे म्हितीगु ज्याझ्वः दु । नेपालं न्हापांखुसी विश्वकप छनोट म्हिताच्वंगु खः ।

सम्बन्धित बुखँ

LEAVE YOUR COMMENTS