ने. सं. ११४६ बछलागा अष्टमी -

थुमि नियत छु ?

जिं बोक्सी वःगु मखं । तर । बोक्सी दुबिउ वःपिंसं अन्तसन्त बके याइगु बारे न्यने नं । खतुं । थौंकन्हय् बोक्सी विद्यायात अन्धविश्वास खंकी । विश्वास याइपिं नं म्हो जुया वनी । तर गां गामय् अद्यापि बोक्सीप्रति विश्वास दनि । बोक्सी वइ । बोक्सीं अनेतने बके यानाः ‘जि फलाना फलाना’ धकाः नां बके याइ । बोक्सीं नां बके याःगु भरय् गुलिखे अबोध मनूतय्त बोक्सीया आरोप बियाः कसाः नकी । दुःख बी । समाजय् भाँडभैलो सिर्जना याइ । बोक्सी विद्या सामाजिक विकृति खः । व सत्य मखु । मनोविकारया प्रस्फुटन जक खः । थौं सामाजिक अभियन्तातसें जनचेतना थना हइ । बोक्सी विद्या समाजया निंतिं अभिशाप खः । थ्वयात जनमानसं चिइकेमाः । प्रचार प्रसार याइ ।

तर । आश्चर्य ! छखेर । समाजय् बोक्सी विद्या धइगु सत्य मखु, विकृत मनस्थितिया उपज खः । थ्वं सामाजिक सद्भावयात तहसनहस याइ । समाजय् अविश्वास व कलहया वातावरण थनी । जनचेतना थनेत उतिकं कुतः याइपिं दइ । मेखेर । देय्या राजनीतिक ख्यलय् बोक्सी विद्यां हा कया हइ । न्हियान्हिथं बोक्सी विद्यां देय्या राजनीतिज्ञत दीक्षित जुजुं वयाच्वंगु खनेदइ । देय्या राजनीति ख्यः स्वयं बोक्सीमय जुइधुंकल । राजनीतिक नेता धाःपिंके सामान्य सुझबुझ शुन्य जुइ । रातदिन बोक्सी दुबिना च्वंपिं थें । अनेक खँ बके यानाच्वनी । वयातं थ्वयातं अनेक आरोप बियाच्वनी । सराः बियाच्वनी । प्रतिपक्षतय्त सत्यानाश यानाबी । धम्की बियाच्वनी । बोक्सी वःगु सुरय् नेतातय्सं ‘जि सु म्हसिउ ला ?, जि देय्या संरक्षक ! महान नेता । का, जितः थि जक थिउ । वयात जिं भष्म यानाः फसय् ब्वेका छ्वयाबी । बोक्सी दुबिनाच्वंपिं नेतातसें तिंतिं न्हुयाः थःगु अहंकार प्वंका च्वनी ।

देय्या जनता थौं किंकर्तव्यविमूढ । देय्या कथित स्वनामधन्य नेतातय् सनक, बकबकया भरय् म्वायेमाः । इमिगु वँय्सूयात हे शिरोपर यानाः च्वनेमाः । मखु । थ्व नेतातय्के दुबिउ वइपिं बोक्सीत सु ? जनताया नुगलय् खुलदुल जुइ । तर नेतातय् पुचलय् छम्हं मेम्हेसित आरोप प्रत्यारोप याना हइ । ‘बोक्सी ! छ उत्तरपाखें संचालित मखुला ?’ मेम्हं हाकनं बके याइ ‘ छ ले छ, छ ला दक्षिणं लहिनातःम्ह बोक्सी मखुला ? सुनां मसिउ !’ तेस्रो नेतायात आक्रमण यासें क्रान्तिकारी बोक्सी नेतां सः थ्वयेकी ‘छ ला सात समुद्र पारीं संरक्षित बोक्सी खः । छंत ला ध्वस्त यायेमानि ।’ थौं देशय् विकास, समृद्धिया नामय् बोक्सी नेतातय् दथुइ जुइगु थुकथंया आरोप प्रत्यारोपया गर्जनं गुञ्जायमान जुयाच्वंगु दु । तर दुर्भाग्य ! बोक्सी विद्यां दीक्षित नेतातय् जगजगीं जनताया हि झं झं गना वनाच्वंगु दु । ज्यान झं झं सुखू चिना वनाच्वंगु दु । थथे हे बोक्सी नेतातय् जगजगी जुइगु खःसा, देय् गंल्वचं ग्रस्त जुइ । थुकी शंका मदु ।

थौंकन्हय् आधुनिक चिकित्सकतसें हालया देय्या नेतातय्त मनोरोगीकथं नं खंकाच्वंगु दु । छम्ह देय्या अग्रपंक्तिया नेतां ‘जितः, आत्महत्या यायेगु इच्छा वइ’ धाःगु खँ न्यनाः छम्ह नांजाःम्ह डाक्टरं व नेतायात मानसिक ल्वचं ग्रस्त खंकी । छम्ह भूतपूर्व प्रधानमन्त्रीं ‘जिगु कार्यकालया थ्व उपलब्धी गिनिज बुकय् बछि थाय् जाइ ।’ दावा याइ । मेम्ह छम्ह युवा नेता ‘सन्काहाया अहंकारी । कुं खिनी । हालया प्रधानमन्त्री निरीक्षण भ्रमणय् वनी । जनतां प्रश्न यायेत स्वइ । प्रधानमन्त्रीजुं ‘छ सुम्क च्वं, अप्वः नवायेमते ….. क्वत्यलेत स्वइ ।

जिं प्रम देउवाया मेगु छगू विद्यार्थीलिसेया अन्तक्र्रियाया कार्यक्रम नं स्वइगु दु । अन नं देउवाः मस्तय्त हक्कीगु, ब्वः बीगु, अशिष्ट व्यवहार क्यनी । मनोचिकित्सकया मिखाय् देउवाया थज्याःगु पहः सामान्य खने दइला ? भूतपूर्व प्रधानमन्त्री बाबुरामया म्हाइपुयाः छु याये ? छु याये ? जुइ । म्हुतु चासुइ ! ‘आः हाकनं मेगु जनआन्दोलन यायेमाल । जनतां ज्यान अर्पणयायेमाल ।’ गुलिसिनं धाइ बाबुरामया नं हावा खुस्के जुल । माओवादीया छगू जुलुस । ‘एमसीसीया विरोधय् नारा थ्वइ । कमरेड प्रचण्डं थ्व नारायात पनी । तर माओवादी देव गुरुङ एमसीसी पास जुल कि गठबन्धन दुनी । चेतावनी बी । थन न्ह्यसः लुइ । कथित नेतातय् सक्कल छु खः ? थुमिसं धाथें होसहवास तंकेधुंकल ला ? वा जनतायात वँय् यायेत स्वयाच्वंगु खः । थुमिगु नियत छु ?