ने. सं. ११४३ तछलाथ्व द्वादशी -

स्वनिगलय् ४५ प्रतिशतयात खोप, ६० प्रतिशतयात खोप बी फुसा कोरोना नियन्त्रण याये फइ

येँ- देय्न्यंकं न्यना वनाच्वंगु कोरोना पनेगु लागिं बियाच्वंगु खोप स्वनिगःया करिब ४५ प्रतिशत मनूतय्सं कायेधुंकूगु खँ सीदुगु दु । थ्व खोप स्वनिगलय् न्हापांगु मात्रा ४४.३३ प्रतिशत व पूर्ण मात्राया खोप ४० प्रतिशत मनूतय्सं कायेधुंकूगु दु ।

स्वास्थ्य सेवा विभागं बिउगु जानकारी कथं स्वनिगलय् आः तक १५ लाख ५५ हजार ८९५ म्हेसित न्हापांगु मात्रा व ११ लाख ७१ हजार ४२० म्हेसित पूर्ण मात्राया खोप बीधुंकूगु दु ।

देय्न्यंकंया ल्याः कायेगु खःसा आः तक न्हापांगु मात्राया खोप १९.९ प्रतिशतयात बीधुंकूगु दुसा पूर्ण मात्राया खोप १८ प्रतिशतयात बीधुंकूगु दु । देय्न्यंकंया ल्याः स्वयेगु खःसा स्वनिगलय् निदुगं स्वयां अप्वः मनुखं कोरोना विरुद्धया खोप कायेधुंकूगु दु ।

अथे हे राजधानी येँ जिल्लाया जक ल्याः स्वयेगु खःसा थन न्हापांगु मात्राया खोप ५० प्रतिशत मनूतय्सं कायेधुंकूगु दु । अथे हे निगूगु मात्राया खोप ४१ प्रतिशतं कायेधुंकूगु दु । येँय् ११ लाख ३७ हजार १६८ म्हेसिनं न्हापांगु मात्राया खोप व ९ लाख ३३ हजार २६१ म्हेसिनं पूर्ण मात्राया खोप कायेधुंकूगु दु ।

उकथं हे ख्वपय् न्हापांगु व पूर्ण मात्राया खोप कायेधुंकूपिं मनूतय् ल्याः ४१ प्रतिशत थ्यंगु दु । यल जिल्लाय् न्हापांगु मात्रा ४५ प्रतिशत व पूर्ण मात्रा ३८ प्रतिशत जनसंख्यां कायेधुंकूगु खँ नं मन्त्रालयं धाःगु दु ।

स्वास्थ्य तथा जनसंख्या मन्त्रालयं धाःकथं म्होतिं नं ६० प्रतिशत जन– संख्यायात खोप बी फत धाःसा कोरोना ल्वय् नियन्त्रण याये फइगु अवस्था जुइ । मन्त्रालयया तथ्यांक कथं ख्वपय् १ लाख ५४ हजार ८३५ म्हेसिनं न्हापांगु मात्रा व १ लाख ५६ हजार ८८२ म्हेसिनं पूर्ण मात्राया खोप कायेधुंकूगु दु । यलय् २ लाख ६३ हजार ८९२ म्हेसिनं न्हापांगु मात्राया खोप कायेधुंकूगु दुसा २ लाख २२ हजार ३७१ म्हेसिनं पूर्ण मात्राया कायेधुंकूगु दु ।

महाशाखां धाः कथं स्वनिगलय् विशेष ख्यलय् ज्या याये माःपिं फुक्क हे मनूतय्त खोप बीधुंकूगु दु । लिपांगुखुसी शिक्षक व विद्यार्थीतय्त नं बीगु ज्या जूगु खः । स्वनिगलय् अग्रपंक्तिइ च्वनाः ज्या याये माःपिं फुक्क हे ख्यःया फुक्क हे मनूतय्त खोप बीधुंकूगु दावी नं महाशाखां याःगु दु ।

नेपाल सरकारं थगुनेया माघ १४ गतेनिसें खोप बीगु सुरु यायेधुंकाःलि वंगु न्हय्लाया दुने थ्वहे भदौ १६ गते तक १ करोड ९२ हजार १६४ म्ह सर्वसाधारणं खोप कायेधुंकूगु दु । सरकारं आः सम्पूर्ण नेपाःमि जनतायात खोप बीगु ताः तयातःगु दु ।

येँ मनपाय् सीपिं ५३५ थ्यन
कोरोना संक्रमणया कारणं येँ महानगरपालिका दुने जक वंगु दत्याया दुने ५३५ म्ह मनूया ज्यान वनेधुंकूगु दु । थ्व अवधिया दुने ८० हजार ५२६ म्ह मनूयात कोरोना संक्रमण जूगु खँ नं सीदुगु दु । येँ महानगरपालिकापाखें सार्वजनिक याःगु लिपांगु जानकारी कथं थन आः तकया दुने ५३५ मनू कोरोनां कयाः सीधुंकूगु खः । येँ महानगरपालिका दुने आः तक नं सक्रिय संक्रमितया ल्याः २५६१ म्ह दनि । थ्व सक्रिय संक्रमितत मध्ये नं २४५० म्ह होम आइसोलेसनय् च्वनाच्वंगु दुसा मेपिं ५५ म्ह संस्थागत आइसोलेसनय् च्वनाच्वंगु दु ।
येँ महानगरय् कोरोनां कयाः सीपिं मनूत दकलय् अप्वः वडा नं. १६ य् च्वंपिं खः । अन ८० म्ह संक्रमित सीधुंकूगु दु । देय्न्यंकं कोरोना संक्रमित जुयाः सीपिं मनूत ल्याः म्हीग ११ हजार स्वयां अप्वः थ्यंगु खः ।