बांलाक न्ह्य वयेकेत छु नयेगु ?

न्ह्यः झीगु शरीर स्वस्थ यानातयेत मदयेकं मगाः । बांलाक न्ह्यः वयेकेफत धाःसा झीगु म्हयात यक्व हे फाइदा याइ । बांलाक न्ह्यः वयेके मफत धाःसा झीगु म्हययात नं स्यंकाबी । यदि बांलाक न्ह्यः वयेकाः द्यने खन धाःसा ताःई तक दयाच्वनीगु दीर्घ ल्वय्या खतरा म्हो यानाबी । थुकिं छिगु दिमागयात नं स्वस्थ यानाबीसा इम्युन सिस्टमयात नं बल्लाकाः मेमेगु ल्वय्लिसे ल्वायेगु क्षमता अप्वयेकाबी ।
उकिं झी न्हि न्हय्घौ च्याघौ न्ह्यः वयेकः द्यने हे माः । तर थांैकन्हय्या व्यस्त जीवन, यक्व कथंया तनावया कारणं मनूत बांलाक द्यनेफयाच्वंगु मदु । अमेरिकाय् जक थौंकन्हय् स्वम्हे छम्हेसिनं न्ह्यः गाक्क द्यने मफुगु खँ अनया स्वास्थ्य निकाय सेन्टर फर डिजीज कन्ट्रोल एण्ड प्रिवेन्सनं धाःगु दु ।

बांलाक न्ह्यः गाक्क द्यनेगु निंतिं थीथी खँया भूमिका दयाच्वनी । थथे हे छगू अहम भूमिका झीगु नयेगु डाइटया नं दइ । झीसं नयेगु छुं छुं वस्तुइ थज्याःगु कम्पाउण्ड नं दयाच्वनी कि गुकिं ‘स्लीप साइकल’ अर्थात न्ह्यःया चक्रया छुं छुं ब्वयात नियन्त्रित यायेत ग्वाहालि याइ । थज्याःगु नसात्वँसां झीत द्यनेत व न्ह्यः वयेकेत यक्व ग्वाहालि याइ ।
न्ह्यःया बांलाक वयेकेत छु गुबलय् नःसा जिउ, छक्व स्वये ।

मस्र्या बरां
थीथी पोषकतत्व दइगु मस्र्या बरां झीगु स्वास्थ्यया निंतिं यक्व हे फाइदाजनक खः । मस्र्या बरांलय् मेलाटोनिन यक्व मात्राय् दइ । मेलोटोनिन धयागु छगू थज्याःगु हार्मोन, गुकिं न्ह्यः वयेकेगु व न्ह्यलं चायेकेगु चक्र (स्पील एण्ड वेक साइकल)यात कन्ट्रोल यायेत ग्वाहालि याइ । अथेहे ३० ग्राम मस्र्या बरामय् ७७ मिलग्राम म्याग्निसियम व ७६ मिलिग्राम क्याल्सियम नं दइ । थ्व निगुलिं खनिज पदार्थं मांसपेशीयात आराम बीत व न्ह्यः वयेकेत ग्वाहालि याइ । गाक्क म्यानेसियम नल धाःसा अनिद्राया समस्या दुपिंत नं बांलाक न्ह्यः वइ । अथेहे म्याग्नेसियमं तनाव अप्वयेकीगु हार्मोन कोर्टिसोलया लेवलयात नं म्हो यायेत ग्वाहालि याइ । तनाव अप्वलकि बांलाक न्ह्यः वयेकेफइमखु । उकिं तनाव म्हो यानाः बांलाक द्यनेगु खःसा द्यने न्ह्यः छम्हुचा बरां नयाः द्यंसां जिउ ।

केमोमाइल टी
केमोमाइल टी स्वास्थ्यय् यक्व कथंया फाइदा याइगु तसकं लोकंह्वाःगु हर्बल टी खः । इम्युन सिस्टमयात बल्लाकेत, एन्ग्जाइटी व डिप्रेसन म्हो यायेगु लिसें बांलाक न्ह्यः वयेकेत केमोमाइल टीं यक्व ग्वाहालि याइ । केमोमाइल च्याय् एपिजेनिन धाःगु तत्व दइ । थ्व छगू एन्टिअक्सिडेन्ट खः, गुकिं मस्तिष्कय् दुगु अज्याःगु रिसेप्टर्सयात कयच्याना दइ, गकिं न्ह्यः वयेकेत ग्वाहालि याइ, अले अनिद्रा अर्थात इन्सोम्नियायात म्हो यानाबी ।

छगू अध्ययनय् निवाः तक केमोमाइल च्या त्वःपिं मिस्तय् न्ह्यःया क्वालिटी केमोमाइल च्या मत्वंपिं मिस्तय् स्वयां यक्व हे बांलाःगु खनेदुगु खः । उकिं छिं नं न्ह्यः बांलाक वयेकेगु खःसा द्यने न्ह्यः केमोमाइल च्या त्वनेफइ ।

क्वाःगु दुरु
स्लिपलेसनेस अर्थात अनिद्राया समस्याया निंतिं बांलाःगु घरेलु उपाय खः –क्वाःगु दुरु । क्वाःगु दुरुइ बांलाक न्ह्यः वयेकेत माःगु ट्रिप्टोफैन, क्याल्सियम, भिटामिन डी व मेलाटोनिन थेंज्याःगु प्यंगू तत्व दइ । उकिं द्यने न्ह्यः छगू कप क्वाःक्वाःगु दुरु त्वनेगु यात धाःसा याउँक न्ह्यः वयेकाबी ।

तर दुरु त्वनेबलय् फ्याट म्हो दुगु दुरु त्वनेगु हे बांलाइ । छाय्कि थ्व दुरु पौष्टिक जुइगु लिसें क्यालोरी नं म्हो जुइ । म्हो फ्याट दुगु छगू कप दुरुइ थुकथंया तत्व दइ– प्रोटिन ७.९९ ग्राम, क्याल्सियम ३०० मिलिग्राम, भिटामिन ए ४९९ आइयु –इन्टनेशनल युनिट), भिटामिन डी १०१ आइयु, क्यालोरी १०१ ।

किवि
किवि म्हो जक क्यालोरी दइगु पोषक तत्वं भरपूर सिसाबुसा खः । छगः किविइ मुक्क ४२ क्यालोरी दइ, अले भिटामिन सि ७१ प्रतिशत दइ । अथेहे थुकिं झीत न्हियान्हिथं माःगु ३१ प्रतिशत भिटामिन नं चूलाकाबी । अध्ययन कथं किविइ बांलाक न्ह्यः वयेकेगु बीगु यक्व कथंया गुण दु । उकिं द्यने न्ह्यः नयेगु छगू बांलाःगु खाद्य पदार्थय् किवि नं लाः । किविइ न्ह्यः बल्लाकीग हार्मोन सेरोटोनिन व एन्टिअक्सिडेन्ट दइ । उकिं द्यःने घौछि निघौ न्ह्यः छगः किवि नयेगु बां हे लाइ ।

ख्वसिं

मस्र्या बरामय् थें अ‍े ख्वःसिनय् नं म्याग्नेसियम, फोस्फोरस, म्याग्नीज व सिजः दइ । थुकिया लिसें ख्वसिनय् ओमेगा ३ फ्याटी एसिड व लिनोलिक एसिड थेंज्याःगु स्वस्थ फ्याट नं दइ । ख्वसिनय् प्रोटिनं नं गाक्क दइ, गुकिं पित्याःयात म्होय यायेत ग्वाहालि याइ । अथेहे न्ह्यःया गुण बांलाकीगु हार्मोन मेलाटोनिन नं ख्वसिनय् गाक्क दइ । थुकी दइगु फ्याटी एसिडं नं न्ह्यः बांलाकेत ग्वाहालि याइ । ओमेगा ३ फ्याटी एसिड म्हय् दइगु डीएचएय् हिलावनी, अले डिएचएं सेरोटोनिन अप्वयेकाबी । उकिं छितः नं न्ह्यः वयेकेत समस्या दुसा द्यने न्ह्यः छगः, निगः ख्वसिं भपियादिउसां जिउ ।

चेरी
चेरीइ नं न्ह्यः बांलाकाबीगु प्यंगू तत्व मेलाटोनिन, ट्रिप्लटोफेन, पोटासियम, सेरोटोनिन भरपुर मात्राय् दइ । टार्ट चेरिइ दइगु पोलिफेनोल्स एन्टिअक्सिडेन्टं नं न्ह्यः बांलाकेत ग्वाहालि याइ । शोधकर्तातय् कथं बांलाक न्ह्यः वयेकेगु व चेरी नयेगु दथइ सकारात्मक स्वापू दु । चेरीइ फाइबर, भिटामिन सि व भिटामिन ई नं गाक्क दइ । थुकिं नं न्ह्यः बांलाकेत ग्वाहालि याइ ।

 

सम्बन्धित बुखँ

LEAVE YOUR COMMENTS