पारिवारिक लजगाः

वंगु असार ६ गते । कोभिड १९या ग्याः चिकु मतं नि, अयसां सानुमैंयाया लजगाः स्वयेगु तातुना जोर नम्बरया स्कूटरय् किजा राम व जि किपुलिं स्वयम्भू वना । मञ्जु थेच्वं स्वयम्भूइ ७ बजे थ्यंकःक वल । अले जिपिं स्वम्हेसितं सानुमैंयां लसकुस यानाः थःगु छेँय् ब्वना यंकल । छेँ यक्व बांलाः, न्हूगु तिनि । कःसिइ हे जिपिं च्वना । जवं खवं मिखा ब्वया । कसिइ स्वांमा, सिमा पिनातःगु मखना । बरु ततःग्वःगु ड्रम निगः स्वंगः खना । ट्रिपाल छपाः कसी पखालय् चिनातःगु नं खना । च्या व ख्यें न्ह्यःने तये हल । च्या त्वँत्वं म्हसीका ज्या न्ह्याकादिल सानुमैंयां ।

“वयकः बाः (श्रीमानया बाः) न्हय् न्यादँ दयेधुंकल । अले वयकः श्रीमान, थ्व काय् बि.बि.एस. ब्वनाच्वंम्ह ।”

जिमि च्या त्वँत्वं खँ नं न्ह्याका । “छिकपिंसं कःसीइ छुं नं पिनातःगु मखना ?” जिं न्ह्यसः तया ।

“बर्खाबलय्या लः मुंकेगु यायेमाःगुलिं कःसिइ छुं नं पिना मतयागु । करिब चय्द्व-गुइद्व (८०(९० हजार) लिटर लः कुनेच्वंगु ट्यांकीइ मुंकेगु खः । थ्व लः जिमिसं त्वनेतः, वसः हीत, थलबल व तरकारी सिलेत, अले बाथरुम व ट्वाइलेटय् प्रयोग यायेगु याना । दछिया दुने निलायात जक ट्यांकरया लः न्याना जिमिसं” सानुमैंयां कनादिल ।

आकाशया लः मुकेंगु तरिका “तरकारी गन पिना दिया ले ?” न्ह्यसः हानं जिं हे तया ।

“ट्याकीया द्यःने क्रेटय् मल्ता पिनातया । पोलिथिन ब्यागय् व बोराय् तरकारी दु। फसि नं पिनातयागु दु। मोहनीबलय् नयेत काउलि, ब्रोकाउलि थःसालाः तयेधुंकल बा नं ।” सानुमैंयां लिसः बियादिल ।

टैंकया द्यःने क्रेतय् मल्ता पिना तःगु “मल्ता ला यक्वः सइथे च्वं” मन्जुं न्यन ।

“अप्वः जूगु मल्ता मीगु याना” सानुमैंयाया लिसः ।

“थुलिमछि बालि पिनातःगु दु । साःया बन्दोबस्त गथे याना ले ?” जिगु न्ह्यसः वन ।

“जिमिसं छेँया लिउने खुइन्यागू वर्गफिटय् दलंबि (दम्बि) लहिनातयागु दु । अनं करिब ९० किलो दलंबिं दछिया १० टन जैबिक फोहर नयाः १ टन साः दयेकाबिइ । व हे साः बालीइ नं तयेगु, अप्वःगु मि नं मीगु यानाच्वना” सानुमैंयाया लिसः वल ।

म्हिगु साः दयेकाः बिइपिं दलंबित “१ किलोया गुंलिं मियादिया ? गुलि किलो तक मियादिया ?” जिमिगु न्ह्यसः ।

“१ किलोया ५० तका । १ टन अथवा १००० किलो तक मिया ।” सानुमैंयाया लिसः वल ।

साःमिया दछिया न्यय्द्व आम्दानी यानादीगु जुयाच्वन । जिमिगु न्ह्यसः पिहांवये न्ह्य हे सानुमैंयां कनादिल “दलंबिनं ६० किलो ति दछिया मिया । १ किलो दलंबिया ३००० दरं मिइगु खः ।”

जिं मन मनं ल्याः खाना । वाह ! १,८०,०००।०० दलंबि मिया वय्कःपिंसं कमाइ यानाच्वंगु जुयाच्वन । लः न्यायेगु हिसाब यानाबलय् ४५,०००।०० ५०,०००।०० तक बचे यायेफुगु जुयाच्वन ।

जिं मनमनं हिसाब यानाच्वनागु सीका सानुमैंयां आम्दानी कनादिल “महिनाय् छेँ जक च्वना नं १७,०००।०० निसें ३५,०००।०० हजार तक बाः नं कमे यानादी । काठमाडौं महानगरपालिकाय् जिगु जागिर, श्रीमान प्लम्बर, वयकःया नं लिमलाः । जिमिगु जीवन बांलाक न्ह्यांवना च्वन ।”

वाह! प्यम्ह परिवारय् स्वम्ह कमे याइपिं । कलेजय् बि.बि.एस.ब्वनांच्वंम्ह कायम्हेसिके न्यना “बाबु छंगु छु योजना दु ?”

“मां, बाः, हजुर बाःयात ग्वाहाली यायां जितः नं थ्व ज्या बांलाः ताल । प्रचार प्रसार यायेगु ज्या याना बियाच्वना । लिपा तःधंक हे थ्वहे व्यवसाय् यायेगु बिचाः दु ।”

मांम्ह लगनशील व उद्यमशील धयां ला कायम्ह ला झन चीगः मल्ता पालु धायेथें । पलाः सुथां लायेमा धका जिमिसं व बाबुयात सुवाः बिया ।

अले सानुमैंयां थःगु बारे छापय् जूगु च्वसुत क्यनादिल । थःम्हं च्वयाः पिहांवःगु स्वंगू लेख नं ब्वयादिल । च्या व ख्येँ नापं न्हूगु खं प्वाः जाल । जिमिगु न्ह्यपुइ छुं खँ दुहांवन । कोरोनाया महामारीया इलय् नं धिसिलाक्क म्वाये फयेका बियाच्वंगु थ्व लजगा यल । परिवार मिलय् जुयाः ज्या याःसा सफल जुइगु जुयाच्वन । झी फुक्कसिनं नाला कायेमाःगु थ्व पारिवारिक लजगा । लजगा सुथांलाक्क न्ह्याके फयेमा धकाः वय्कःपिंत  भिंतुना देछायाः जिपिं खुसी जुयाः लिहां वया ।

प्रा. डा. धर्मराज डंगाेल