जनकविया भिंतुना म्ये, फिल्म सिद्धान्तया सफू व शर्टफिल्म पितब्वज्या

नेपाल संवत् ११४१ न्हूदँया लसताय् छगू हे मञ्चं जनकवि दुर्गालाल श्रेष्ठया भिंतुना म्येय्या म्युजिक भिडियो, फिल्मकःमि राकेश महर्जनया ‘फिल्म सिद्धान्तया खँ’ सफू अले महर्जनया हे न्हूगु शर्टफिल्म ‘कलरफुल अम्ब्रेला’ पितब्वज्या जूगु दु । नेपाल संवत् न्हूदँ राष्ट्रिय समारोह समितिया नायः रमेश महर्जनया मूपाहांसुइ म्ये, सफू व फिल्मया पितब्वज्या कौलागा १३ (कार्तिक २८) शुक्रवाः जूगु खः । नेपाः ब्यांक्वेटय् जूगु उगु पितब्वज्या ज्याझ्वःयात नेवाः युट्युबय् प्रत्यक्ष प्रशारण याःगु खः ।

समारोह समितिया इनापय् जूगु ज्याझ्वलय् मूपाहांया थासं न्ववानादिसें समितिया नायः रमेश महर्जनं नेपाल संवत् राष्ट्रिय संवत्, पहिचानया संवत्, राष्ट्रिय गौरवया संवत् व सांस्कृतिक संवत् खः धयादिल । महर्जनं कोरोना महामारीया इलय् थुज्वःगु संवत्या न्हूदँ हनेत जनकवि दुर्गालाल श्रेष्ठया भिंतुना म्यें आत्मबल थनेत ग्वाहालि याःगु व न्हूगु उत्साह ब्वलंकूगु दु धयादिल । विमोचित सफूया च्वमि राकेश महर्जनं थम्हं कयाःगु फिल्मया ज्ञानयात नेवाः फिल्मकर्मी दथुइ इनेत सफू पिथनादीगुयात नं च्वछायादिल ।

ज्याझ्वलय् जनकवि दुर्गालाल श्रेष्ठया म्येयात कयाः न्हूदँ राष्ट्रिय समारोह समिति ११४१ या सचिवालय दुजः उमेश स्थापितं कनादीगु खः । महामारीया इलय् आशावादी भावना ज्वनावःगु म्येकथं च्वछायादिसें थुकिं झी न्ह्यःने वःगु पंगःत चीकाः थःगु आज्जु कायेत न्हूकथं म्वायेत व न्हूकथं न्ह्यायेत तिबः बीगु विचाः नं प्वंकादिल ।

अथे हे, ज्याझ्वलय् विमोचित सफूया विषयलय् न्ववानादिसें वरिष्ठ सिनेपत्रकार विजयरत्न असंबरें नेवाः संकिपाया ख्यलय् न्हूगु इतिहास निर्माणय् थ्व छपलाः जूगु दु धयादिल । फिल्म सिद्धान्तया सफू नेपालय् मेमेगु भासं नं पिमदनीगु इलय् नेपालभाषां हे न्हापां पिदंगु थ्व सफूयात खसनेपाली भासाय् नं भाय् हीकाः पिथँसा आदिवासी जनजातिलगायतया मेमेपिं फिल्मकर्मीदथुइ नं थ्व सफू महत्वपूर्ण जुइगु विचाः वय्कलं प्वंकादिल । नापं वय्कलं नेवाः फिल्म ख्यलय् ज्या सनाच्वंपिंत थ्व सफू ब्वने हे माःगु ज्वलं जूगुलिं ब्वनेत इनाप नं यानादिल । ज्याझ्वलय् लसकुस यासें नेवाः युट्युबया प्रमुख सुजीव वज्राचार्यं न्हूदँ लसताया खँ जक मखसे थ्व निरन्तर आन्दोलन नं खः धयादिसें थुकिया प्रणेता पद्मरत्न तुलाधरयात लुमंकादिल । वय्कलं न्हूदँ हनेगु विविध रुप व विधिदुने थुकथंया सफू, म्ये व शर्टफिल्म पितब्वयेगु नं छगू खः धयादिसें न्हूदँयात उत्सवकथं थःथःगु थासं हनेत आह्वान नं यानादिल ।

ज्याझ्वलय् विमोचित सफूया पिकाकः नेवाः अमेरिकन दबू, शिकागो, अमेरिकाया प्रतिनिधिकथं केशरमान ताम्राकारया भिंतुना सन्देश नं न्यंकादीगु खः । ज्याझ्वलय् पितब्वज्या जूगु जनकवि दुर्गालाल श्रेष्ठया भिंतुना म्येय् पवित्र कसाःया सः व संगीत दुसा थुकिइ जीवित जल्मीं संगीत संयोजन यानादीगु दु। अथे हे थुकिया म्युजिक भिडियोया छायांकन व सम्पादन योवन शाक्यं यानादीगु दु ।

अथे हे, नेवाः युट्युबया प्लेटफर्मय् सार्वजनिक जूगु राकेश महर्जन निर्दे शित शर्टफिल्म ‘कलरफुल अम्ब्रेला’य् विकेश मानन्धर, सम्यक मानन्धर व प्रमिला रंजितपिनि अभिनय दु। शर्टफिल्मया छायांँकन व सम्पादन सागर गहतराजं यानादीगु खः ।

सम्बन्धित बुखँ

LEAVE YOUR COMMENTS