लुम्बिनी विश्वविद्यालयपाखें परीक्षा संचालन

येँ (नेपालभाषा टाइम्स) – लुम्बिनी विश्वविद्यालयं छेँ छेँय् परीक्षा संचालन याःगु दु। विश्वविद्यालयं स्नातकोत्तर व स्नातक तहया परीक्षा वंगु आइतवाःनिसें संचालन याःगु खः । विद्यालय शिक्षालिसें विश्वविद्यालयया शिक्षा तकं प्रभावित जुयाच्वंगु अवस्थाय् लुम्बिनी विश्वविद्यालयं छेँय् छेँय् परीक्षा ज्याझ्वः अन्तर्गत थः विद्यार्थीतय् निंतिं परीक्षा संचालन याःगु खः ।

विश्वविद्यालयपाखें स्नातकोत्तर तहय् संगीत व पुरातत्व विषयया परीक्षा संचालन यानाच्वंगु दुसा स्नातक तहय् नं कानून, बौद्ध दर्शन व भोट विषयय् परीक्षा संचालन यानाच्वंगु दु। थुकीमध्ये कानूनपाखे जक न्हापांगु सेमेष्टरया ८५ म्ह विद्यार्थी परीक्षाय् सहभागि जुयाच्वंगु विश्वविद्यालयं न्ह्यथंगु दु ।

विश्वविद्यालयं छेँय् छेँय् परीक्षा संचालन यायेगु अवधारणाकथं उकथं परीक्षा संचालन याःगु खः। विश्वविद्यालयया रजिष्ट्रार डा. तिलक आचार्यं थःपिंसं आपालं अध्ययन व अनुसन्धान लिपा छेँय् छेँय् परीक्षा संचालन यायेगु अवधारणा नाला कयागु खँ धयादीगु दु ।

कोरोना महामारीया इलय् परीक्षा संचालन यायेबलय् विद्यार्थी, शिक्षक, कर्मचारीमध्ये सुयात नं संक्रमण जुयाः समस्या वल धाःसा छु यायेगु धइगु तयारीलिसें थःपिंसं परीक्षा संचालन यानागु जानकारी बियादिसें वय्कलं सम्भावित समस्याया विश्लेषण यानाः हे परीक्षा केन्द्र क्वःछिनाः क्लस्टर छुटे यानाः परीक्षा संचालन यानाच्वनागु जानकारी बियादिल ।

विश्वविद्यालयं अस्पताल व मुख्य राजमार्ग लिक्क दुगु खुल्ला व तःधंगु भवनयात परीक्षा केन्द्र क्वःछिनाः परीक्षा संचालन याःगु खः । स्वास्थ्ययात ध्यानय् तयाः थुकथं परीक्षा संचालन यायेबलय् छुं भचा अप्वः खर्च जूसां विश्वविद्यालयया निंतिं धाःसा तसकं उपलब्धिमूलक जुयाच्वंगु वय्कलं कनादिल ।

विश्वविद्यालयं लुम्बिनी, येँ, नवलपरासी, बुटवल, कपिलवस्तु, अर्घाखाँची व हुम्लाय् परीक्षा केन्द्र क्वःछिनाः परीक्षा संचालन यानाच्वंगु दु ।