अमेरिकां ‘नौलो डिजिटल’ च्यानल शुरु, नेपाःया अडियो-भिडियो ख्यःया निंतिं बांलागु दबु जुइगु दाबी

येँ- अमेरिकाय् च्वना वयाच्वंपिं नेपाःमित जाना चायेकूगु डिजिटल प्लाटफर्म नेपाःया अडियो भिडियो सृजना ख्यःया निंतिं छगु बांलागु दबु जुइगु दाबी याःगु दु । थ्वहे सेप्टेम्बर महिनां निसें औपचारिक रुपं न्ह्याकूगु डिजिटल प्लाटफर्म ‘नौलो डिजिटल’या युट्युबय् नेपाः दुने वा नेपाःलिसे स्वापु दुगु सकतां कथं हलंज्वलं दुथ्याकेगु खँ दबुया छम्ह हामा सुनिल माथेमा प्रधानं धयादीगु दु ।

थ्व युट्युबया दकलय् न्हापांगु औपचारिक ज्याझ्वः ‘पलेटी विथ अपला’ नांयागु टक शो अपलोड जुइ धुंकूगु दुसा थुके नेपाःया नांजाम्ह संचारकःमि रमा सिंहलिसेया खँल्हाबंल्हा न्ह्यब्वयातःगु दु । सुनिल माथेमा प्रधान, शरद श्रेष्ठ व रोशन पुरी स्वम्ह जाना चायेकूगु थुगु युट्युब च्यानलय् विशेष यानाः खस नेपाली भाय्या अडियो भिडियो हलंज्वलं दुथ्याकेगु ग्वसाः दुसा थुकी अंग्रेजी भाय् वा मेमेगु भाय्या हलंज्वलं नं ईब्यः स्वया दुथ्याकीगु खँ थुकिया हामा प्रधानं कनादिल ।

कोरोना संक्रमणया कारणं हलिंन्यंकया फिल्मख्यः शुन्य अवस्थाय् लानाच्वंगु व विशेष यानाः नेपाःया खस नेपाली फिल्मया स्वकुमिपिं आः याकनं हलय् फिल्म स्वःवनेफइगु अवस्था मदुलिं नेपाःया फिल्म ख्यःयात हलिंन्यंक च्वनाच्वंपिं नेपाःमिया नापनापं मेमेपिं दथुइ थ्यंकेगु ताःतुना ‘नौलो डिजिटल’या शुरुआत यानागु खँ प्रधानं कनादिल ।

वय्कलं थुगु माध्यमं दुहां वःगु आमदानीपाखें सर्जक वा निर्मातायात अप्वःसिवें अप्वः लवः बिइगु ग्वसाः दुगु खँ नं कनादिल । थुगु युट्युब च्यानलय् फिल्म जक मखसें म्युजिक भिडियो, टक प्रोग्राम, फेशन शो, रियालिटि शो, ईन्टरभ्यु लगायतया अडियो भिडियो सृजनायात थाय् बिइगु खँ नं ‘नौलो डिजिटलं’ जानकारी बिउगु दु ।

थुगु च्यानलय् थःथःगु सृजना दुथ्याकेगु मं दुपिंसं थुकिया स्वम्ह हामा सुनिल माथेमा प्रधान (०१४४०५७०१०३२) , शरद श्रेष्ठ (०१५७१२६५७६३९) व रोशन पुरी (०१७०३६२५७३२९) यात भाइबर मार्फत स्वापु तयेफइगु जानकारी नं ‘नौलो डिजिटलं’ बिउगु दु ।